Amado de su enturaje, afable, modesto i serviable, amorozo de la natura, de la isla de Burgazada, de la literatura, del arte i de la mitolojia, muestro amigo “le grand réveur”, siempre vamos a nombrarlo.
Kon su mirada dulse a la mar Marmara, a Kaşıkadası, a Kalpazankaya, a las mimozas de Kalpazankaya, a los begonviliers de Gönüllü caddesi, a los kayikchis ke los gatos asperan a la madrugada, los vapores elegantes komo novyas akostando; presente en las fiestas en la sinagoga, konferansiero interesante i sovretodo en la kolonia de vakansas ande estuvimos ayudando i amuzando djuntos a los menesterozos jovenes...
SU VIDA
Nasio en 1949. Frekuento el liseo Fransez Saint Benoit. Estudio en İ.T.Ü. Mimarlık ve Mühendislik Fakültesi, Makine Bölümü.
En 1976, se kazo kon Şeli Natan. Tienen dos ijos, Esra i İlker.
Se intereso en la filozofia i el ezoterizmo, izo lavoros sovre estos sujetos.
Malgrado su okupasion en el komersio, supo ayudar munchas ovras i institusiones en okupando postos importantes.
Su poema eskrito en judeo-espanyol para EL AMANESER:
Una luz maraviyoza amanese de la eskuridad
En un dia de ermozura
Los Makabeos salyeron al kamino
Por asender la Hanukiya,
Kon su azete tanto santa.
En el Bet-HaMigdash va alumbrar
Kon su grandeza
I bivira en muestro korason
Fina la eternidad de la djuderia…
Kerido Meir, siempre vas a estar en muestros korasones. Tu livro de poezia SEHERDE GÜL AYDIN es un grande regalo por muestra komunita.
Ke tu alma repoze en Ganeden.
