Daniel Kravitz i El Neonazi

Daniel Kravitz, el proprietario de un magazen de mobles de segunda mano en Denver, se enkanto kuando vido el kliente ekstraordinario ke entro en su magazen. El mansevo estava vistido komo un kriminel (cani), la kavesa arapada, i los brasos dezmudos kuvridos kon tatus (dövme) ke estavan dando el mensaje “Matá a los judios!” Daniel ya entendio ke este mansevo era un neonazi.

El ombre se repozo kuando vido ke no teniya la kipa en la kavesa. La aviya metido debasho del chapeyo ke teniya en la kavesa.

Una ora entera le ayudo al kliente. Le amostro todos los mobles ke teniya en el magazen. Le ayudo a eskojer los ke teniya menester, le izo un presio basho, i les ayudo a los mansevos neonazis a yevar los mobles a la kamyoneta ke estava asperando afuera.

Despues ke se aseguro ke el neonazi no teniya arma (silah) enriva, Daniel le disho: “De verdad te estas kreendo ke los judios son negros, i ke kale matarlos?’ ‘Si’ le respondio el neonazi.

‘Fin agora, izites danyo a alguno?’ le demando Daniel.

‘Si’ disho el mansevo.

Daniel se estuvo kayado por unos kuantos puntos, i despues le demando de muevo: ‘Ke tienes kontra los judios?’

‘Son ladrones i mintirozos!’ Duspues empeso a repetar todos los stereotipos antisemites ke konosemos.

Daniel aspero kon pasensia asta ke el ombre eskapo de avlar. Despues, se kito el chapeyo para amostrarle la kipa ke teniya en la kavesa, i le disho: ‘Saves ke fin agora pasates una ora kon un judio? No fui onesto, amavle, i jenerozo kon ti, todo este tiempo?’

El neonazi kedo la boka avierta. ‘No es posivle! Tu no puedes ser judio’ le disho.

Daniel le amostro la mezuza en la puerta, i el sidur (livro de orasiones) ke teniya enriva la meza. ‘Agora te asegurates ke so judio, i ke no so komo el imaj de los judios ke tienes en la kavesa? A ti, te lavaron el meyoyo. No me esto kreendo ke tu madre i padre te engrandesieron kon este tipo de odio (nefret). Kreygo ke estas biviendo leshos de eyos’.

‘Si’ le disho el neonazi. ‘Ay diez anyos ke esto leshos de mis parientes’.

En este punto, un otro kliente entro al magazen, i Daniel les sueto un buen dia a los neonazis, i se fue para okuparse del kliente.

Sesh mezes duspues, el mansevo vino de muevo al magazen. Esta vez, la kavesa la teniya yena de kaveyos, teniya ermozas vistimientas enriva, i mangas largas para eskonder los tatus ke teniya en los brasos. Daniel se enkanto kuando lo vido. Despues, se aserko del mansevo, i lo abraso kerensiozamente.

‘Kale ke te demande pardon, i ke te remersye’ le disho el mansevo, kon lagrimas en los ojos. ‘Me izites ver ke todo lo ke kreiya no era verdad. Grasias a ti, agora ya se lo ke es un judio, i me desidi de trokar mi vida. Me fui al lado de mis parientes. Agora esto biviendo kon mi madre i padre’.

Traduizido de un artikolo en el Periodiko Aish.com 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın