Aktividades Kulturales en Edirne

Dospues de la avyertura de la Grande Sinagoga de Edirne organizimos aktividades kulturales i artistikas. Un chiko grupo mizmo si una partida no son d’Andirne estamos lavorando para ke muestra Sinagoga sea vijitada por miles de personas. Ay dos anyos ke realizamos ekspozisyones en partikular de fotografias para ke los ke vijitan este edifisyo maraviyozo tengan la posibilidad de kedar un poko mas en vijitando la ekspozisyon.

Es la semana pasada ke la Grande Sinagoga de Edirne fue elijida entre las mas emportante kinze sinagogas del mundo ke se deve de vijitar. Esto va ser un punto muy emportante para propajar la reputasyon de este templo.

Kada anyo el 23 de Avril ke es un diya de una fiesta nasyonal, todos los ke eskaparon el Liseo de Edirne se arekojen en la eskola para “el Diya de Arroz”. En Turkiya la mas grande partida de los lises tienen un diya i kada anyo se arekojen para partajar sus rekuerdos i para komer endjuntos un arroz o un borek o si es una eskola franseza una koza mas franka komo diya de kezo a la franseza … I todos keren azer una aktividad kultural para pueder arekojer los diplomados de esta eskola ke kreo era anyos antes el solo lise reelmente reputada por su edukasyon. Konosko munchos medikos, dentistos, avokatos, enjenyeres, industriyales i un alay de merkaderes ke frekuentaron esta eskola. I este anyo dospues de la seremoniya ke se realiza en la eskola tenemos dos eskrivanos: el Dentisto Tekin Sayınbaş i el Sinyor Güngör Mazlum ke eskrivyeron livros sovre los Djudios de Edirne van a firmar sus livros a los enteresados. I el mizmo diya vamos a inogurar una ekspozisyon ke se aparejo de la arshiva de fotos del Sinyor Niso Kaneti ke bive en Israel ma ke es orijinario de Edirne i oy dainda vijita esta sivdad akoruto (sık sık). La ekspozisyon de fotografiyas de los Djudios de esta sivdad se yama “La Memoria de los Djudios d’Andirne”. Estamos lavorando kon fotoshop para tener fotografiyas mijores ke los orijinales. Porke reelmente en esta koleksyon ay siertas fotografiyas de mas de noventa anyos.

Kada anyo en la Semana de las Fondasyones estamos organizando un konserto i una ekspozisyon. Normalmente el 14 del mez de mayo estamos organizando un konserto kon el kontrtenor famozo David De’or. I el 11 de Mayo va ser la avyertura de una ekspozisyon de fotografiyas. La ekspozisyon es nomada “Yerushalayim-Kudüs-Jerusalem”. Los artistos son İzzet Keribar, Rubi Asa, Vladi Benbanaste, Kemal Eskenazi i Jil Pardo. İzzet es el artisto de fotografia el mas renomado en muestra komunidad i es konosido en kada parte del mundo. El punto el mas emportante de esta ekspozisyon es ke Keribar kon su modestiya la esta organizando kon artistos muncho mas mansevos ke el. I esto mos da koraje para el futuro de esta ovra artistika. Reelmente tenemos mansevos muy talentuozos ke estan organizando ekspozisyones de alta valor. Kale dar koraje a estos artistos para ke kontinuen sus vidas artistikas.

I kijimos dar el nombre de la ekspozisyon en tres linguas ke kada una sinyifika una relijion diferente. Espero ke dospues de Edirne vamos a pueder ekspozar esta ekspozisyon en Estanbol ande munchas personas van a pueder vijitar.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın