La distribusion de la populasion de la medina

Dora NİYEGO Judeo-Espanyol
3 Mayıs 2017 Çarşamba

Israel va selebrar el 69en anyo en el 2 de mayo. De esta manera, la populasion i la distribusion de su djente va salir en medio.

Kuando se establisio el Estado de Israel en el anyo1948, se estimo ke la populasion iva ser 806,000 en akeyos anyos, i en el anyo 2048 iva pujar a15,2 miliones.

El 74.7% de la populasion de oy son judios. Oy ay 6,484 miliones de judios, 1,808 miliones de arabos ke aze el 20.8% de la populasion, i 388 mil de otros sivdadinos de minoritas etnikas ke son el 4.5% de la populasion.

El anyo ke pasimos, la populasion de Israel ogmanto un 1.9%  ke son 159,000 personas. Durante esta perioda, 174 mil bebes nasieron en la medina, 30 mil refujiados vinieron a Israel, i 44 mil personas murieron.

Kuando a la edad de los sivdadinos: 34.6% son mas chikos de 18 anyos, 54.3% tienen entre 19-64 anyos, 11.1% son mas grandes de 65 anyos. A la fin del anyo 2015, avia 45.000 sivdadinos mas ayedados de 90 anyos. El 75% del pais nasieron en Israel, i mas de la mitad de la segunda jenerasion. A partir de 1948, oy en dia, el 35% de la populasion dainda biven.

De los judios, el 44% son konsiderados sekulares (hiloni), el 24% konsideran el tradisionalizmo, el 11% son relijiozo-tradisionalistos, i el 9% son ultra-ortodoksos (haredi).

De los ke no son judios, el 52% son relijiozos, el 23% no son muy relijiozos, el 21% no son relijiozos, i el 4% son muy relijiozos.

A los ke son mas grande de 20 anyos, kuando les demandas ‘Komo es la vida en Israel?’, el 89% esta kontente de su vida, el 59% esta kontente de su kondision ekonomika, el 52% esta kreendo ke va ser mijor en el futuro, i el 44% esta kreendo ke la kondision se va mijorar.

El teritorio de Israel es de 22.072 km2 asta Eslovenia. La sivdad la mas grande es Yerushalayim kon una populasion de 865,700 personas. Kuando el Estado de Israel fue fundado en el anyo 1948, aviya 11.5 millones de judios en el mundo entero, i solo el 6% bivia en Israel. Oy en dia, el 43% de los 14.411 miliones de judios del mundo, bive en Israel.