El Djudaizmo segun Leon Tolstoi 1828- 1910 I tambyen segun Winston Churchil 1874- 1965

Klara PERAHYA Judeo-Espanyol
9 Ağustos 2017 Çarşamba

Sl … Leon Tolstoi era un grande admirador del Hasidizmo djudyo de los primeros tyempos, un hasidizmo munchas vezes absolutamente sometido a  preskripsyones antiguas sin kualkyera posibilidad de evolusyon.      

El grande eskritor ruso ke fue munchas vezes konsiderado komo la “konsyensya” de su tyempo era inevitavlemente kontraryo al Sionizmo ke el konsiderava komo un faktor negativo.

Tal ke lo meldi durante una chika bushkida ke ize konsernando este sujeto, Leon Tolstoi avia munchas vezes dicho: “Este muevo movimyento ke yamamos  “sionizmo”  me intereso syempre, no porke “el” da a su puevlo una solusyon a su penivle situasyon, ma al kontraryo porke el es un egzempyo evidente de la inmensa influensa negativa ke munchas vezes  varyas  personas pueden akseptar, aun sus lusides i la konsyensya de la vanedad de un muevo ideal”. 

Komo lo konstatimos en el teksto de su deklarasyon ke fue publikada la semana pasada en esta mizma pajina del semanaryo Şalom, Leon Tolstoi konsiderava el djudaizmo komo “la fuente de la kuala las otras nasyones ekstraeron la baza de sus relijyon i de sus kultura.” 

I kuando ‘el dezeo imperyozo de tener sus tyerra propya’ se desperto  en multiples korasones djudyos, el mizmo grande intelektual Ruso adjunto:

“…delantre mis ojos un puevlo antiguo, intelijente ansi ke riko de una grande eksperyensa i ke munchas vezes (kale admeterlo) sufrio de una manera terrivle, kere agora de muevo retornar a un mizmo mal. En el, de muevo espuntaron la sed i el menester imperyozo de tener su propyo governo ansi ke el dezeo de djugar un rolo en la evolusyon del mundo… De muevo ‘el’ dezea enrikeserse de todos los aksesoryos del nasyonalizmo kon sus trupas de soldados, sus bandyeras i sus aspirasyones de ejemonia”.

 

   Es ansi ke el mizmo Leon Tolstoi el kual avia echo la apolojia del Hasidizmo, konsidero el Sionismo komo una traisyon echa a la pureza del djudaismo.

    En el anyo 1903 ke era la epoka de los pogromes al Este de la Evropa, el selebre eskritor Yiddish, ‘Sholem Aleihem’ avia demandado por letra al grande autor Ruso de partisipar a la manifestasyon kontra los suplisyos inflijidos a la populasyon djudia, en eskrivyendo a este sujeto un kurto o largo teksto de protestasyon.

Ma, desgrasyadamente, el intelektual djudyo nunka resivyo kualkyer repuesta de parte de Leon Tolstoi.

Komo eksplikar este silensyo? A kualo atribuir esta indiferensya?

Leon Tolstoi no inyorava el martiryo del puevlo djudyo ni la salvajeria de los agresores ke paresian topar plazer a azer sufrir muestros ermanos  durante los primeros tyempos del maldicho venten siglo.

Personalmente nunka pude entender por ke razon realmente imperyoza, el ke (komo fue dicho mas arriva) era konsiderado komo ‘la konsyensya del puevlo Ruso’ nunka enaltesyo la boz para protestar?

Si pensamos mas profundamente, puedemos puede ser dedusir ke  semejantes silensyos kontribuyeron a aparejar poko a poko la inkomparavle desgrasya de la segunda gerra mundyal.

Las opinyones pueden ser diferentes de persona a persona i partikularmente kuando imprevizivlemente desgrasyados faktores negativos intervyenen entre dos diferentes maneras de pensar.

Ansi, una kestyon mos vyene al tino: “Si muncho mas tadre Leon Tolstoi era ainda en vida durante la epoka de la Shoah, es ke el iva syempre kedar kayado sin realmente intervenir?”.

Byen entendido, kada persona tyene su propya manera de ver i de konsiderar las kozas i los multiples eventos ke mos entornan.

Vinyendo a Winston Churchil, en su livro entitolado “Churchil and the Jews, an unlikely obsession”, uno de sus biografos (al pareser Martin Gilbert) mos avla de la profunda empatia del grande Ombre de Estado Ingles por el puevlo djudyo.

Su karakter luchador lo pusho desde sus primeras deklarasyones de responsavle politiko a meterse leshos de kualkyer sentimyento de antisemitizmo.

Al empesijo de su karyera de politiko, myembro del grupo konservador, el muy presto paso al grupo liberal del distrikto de Manchester ande la komunidad djudia gozava de una grande simpatia de parte de los otros sitizanos.   

En desparte de un ‘grande personaje politiko’, Churchil fue tambyen un grande eskritor, asta mizmo obtener, no muy tadre, despues la segunda gerra mundyal, el Premyo Nobel de Literatura.

Tal ke fue (unas kuantas desenias antes por Tolstoi) grande lektor de la Biblia, Churchil tambyen era konvensido ke el puevlo Kristyano es syempre devdor al puevlo Djudyo de su nivel de alta sivilizasyon.

Ma kontraryamente a Leon Tolstoi, “el Kapo del Governo Britaniko” era tambyen un grande partizano del Sionizmo i mizmo ‘El’ ayudo en la mezura ande esto le era posivle, a la kreasyon de ‘un Estado Djudyo’ el kual sera syempre un refujyo seguro para mujeres i ombres ke bivyeron dos mil anyos sovre tyerras ajenas, munchas vezes kastigados sin razon i arrebashados en sus dinyidad.