Estamos en un tiempo ke semos ovligados de tener kudyo de la gota de agua ke tenemos. Kada una gota se deve de utilizar dos vezes.
ANET PASE
Eitan Na’eh, Ambasador de Israel, Ankara
Dia de Alhad ke meldi el periodiko Hürriyet, en la pajina 14, enkontri el mesaje del Ambasador de Israel, Ankara. Eitan Na’eh esta envitando a todos ke son enteresados en la agua. Desde 2009 ke se estan realizando estas konferensias sovre la agua mondial. A todos los lektores vos konsejo de meldar el mesaje del Sinyor Na’eh.
Israel, desde ke se realizo fin a oy, supo transformar el desierto en tierras agrikolas (Tarım). Esto me fasina i me aze enkantar en kada vijita ke ago a Israel. Los arvoles en todos los kaminos, i las vedruras de agrikultura. Eitan Na’eh dize, a la fin de sinkuenta anyos Israel parvino en la teknolojia de agua, kon muncha kapachidad i kon la kooperasyon internasyonal, i oy en dia los ke tyenen enformasyon i eksperiansa sovre la agua estan prontos para kompartir lo ke saven kon el mundo, ke tiene muncho menester. En el sitio de WATEC, me ambezi munchas kozas sovre el mundo ke va sufriir mas i mas de oy, achakes ke ay sekuras. Los anyos vinideros, va pujar mas muncho la populasion i vamos a tener mas munchos problemas de agua.
La konferensia i la ekspozision se realiza durante tres dias en el Convention Center de Tel-Aviv, Israel. El tema es WATER V.I.P, Inovasion i Praktika. En esta ekspozision, Israel va amostrar komo la teknolojia esta azyendo fakto enriva de la agua. Desde las aguas ke ya tenemos, asta la desalinizasyon (tuzdan arındırmak) de la agua de la mar, i el sistema de mantener la tierra kon gotas… esto todo se va partajar kon los direktores de sistemas, injeniores, investigadores akademikos, profesionales idrikos, aktivistos, inovadores, otoridades publikas, estudiantes, responsavles de alto nivel, fabrikantes ets…
