Dospues ke Klara mos desho la buena vida tengo la responsabilidad de eskrivir artikolos politikos porke un semanaryo komo el Şalom deve de tener una aparensya politika. Klara a sus noventa i ocho anyos meldava i estudyava lo ke se paso en una semana para eskrivir su artikolo. Es djusto ke meldo kada demanyana una gazeta kon sus komentaryos ma para pueder eskrivir un artikolo kale azer mas muncha atansyon en meldando los artikolos i en mirando la televizyon. Malgrado ke kero eskrivir siertas kozas sovre los setenta anyos del semanaryo Şalom, va empesar a eskrivir siertas refleksyones sovre los kavzos politikos. Savemos ke ay muncho material para los jornalistos en muestro payis. Kada diya tenemos un alay de evenimyentos para diskutir.
Alhad la tadre el embashada de los Estados Unidos izo una deklarasyon dizyendo ke todo modo de vizas no van a ser dadas por los Konsulatos Amerikanos ke se topan en diferentes sivdades de la Turkiya. De ke esto? Porke ay unas kuantos Amerikanos o turkos-Amerikanos ke fueron arrestados en Turkiya. I kada uno esta dizyendo diferentes kozas sovre el kavzo. Ken esta dizyendo la verdad? Dingunos no saven. Mizmo los Estados Unidos dospues del muevo prezidente Trump ke no da muncho konfiensya, mos esta dando siertos puntos de interogasyon (soru işareti) sovre lo ke esta dizyendo. De una parte el Hodja Gülen de la otra parte el papaz amerikano; reelmente un muevo problem para el puevlo Turko.
Dospues de esta dechizyon, oy el dolar amerikano tomo un yampish (gidişat) a la suvida (yükselen). Porke de una vanda los Amerikanos limitaron las vizas, de la otra vanda la armada turka entro en la Siria, i esta kon los Rusos para atakar siertos grupos i a realizar una rejion sin armas para ke los Sirianos ke estan en Turkiya (serka de tres milyones) puedan tornar atras. Se va realizar o no, vamos a ver. Reelmente komo lo eskrivi la semana pasada, estamos bivyendo otros problemes kon el Irak ande los Kurdes keren formar un estado. Un otro problem es el apoyo de los Israelyanos. Komo es el payis uniko ke esta sostenyendo (destek veren) este movimyento (hareket) un muevo koryento de antisemitizmo va topar vida en muestro payis i en otros lugares. No so siguro ke Israel es el payis ke da apoyo a este movimyento sin la aprovasyon (tasvip) de los Estados Unidos. Es djusto ke el Estado Djudio puede preferar un estado laiko i ke no es formado por los arabos. Savemos ke los Kurdes i los Irakyanos djudios son bastante fuertes en el Estado Israelyano. Ma devemos de valorizar (değerlendirmek) ke un estado no funksiona (hareket etmek) kon sus sentimyentos.
En la Espanya, dospues de los Katalanes ke keren la independensya esta semana vimos los Katalanes ke keren la Union de los Espanyoles. Oy en diya no se si es muy fasil de formar un muevo payiz. La Espanya ke tiene reelmente muncho bueno i ke el governo sentral (merkezi) da todo modo de otoridad a las provinsyas (eyaletler) no devia de bivir un akto asemejante. Vamos a ver la ke va afitar. Kreo ke el Governo va dar mas munchas posibilidades a los Katalanes i eyos van a trokar sus ideas para kedarsen parte de los Espanyoles. Si en todo los payises Evropeos los trivos (kavim) o los puevlos de una rasa diferente keren formar diferentes payises, deven de djugar syenes de maches para tomar la kupa del kontinente (kıta) evropeo. Mizmo oy en diya kon los muevos payizes Rusos i Yugoslaves tenemos un alay de payizes en la Evropa.
Vos avli de los setenta anyos del Şalom ke vamos a fiestar el 14 del mez del desembre. Reelmente estan organizando una fiesta. Vos va kontar lo ke van a organizar; ma no esta semana...
