Muy frekuente, los tekstos ke eskrivimos en esta pajina peryen sus aktualidad asta ke muestro jurnal arriva a los lektores. O, mas egzaktamente, a un grupo de lektores. Naturalmente, si se trata de un moabet, de una jeneralidad o de un kuento rendido de algun evento sosyal, este retardo puede no tener grande importansa.
Ma kuando se trata de un diya espesyal, aniversaryo o komemorasyon de un evento istoriko, de fyestas relijyozas ets…, a mi me plazeriya prezentar al lektor el teksto antes del diya. Por egzempyo, en muestro jurnal munchas vezes se aze anunsyos de konsertos de solistos ajenos o de organizasyones sosyales, de egzibisyones de arte (o otras) de muestra Komunidad. En kavzos semejantes, en la mezura de las posivilidades puede ser ke ay remedyos para ke el lektor seya avizado antes ke pase la data. Siguro esto es mi opinyon i ya se, bazandome sovre mis eksperyensas ke syempre no es posivle de azerlo.
Mizmo aki, en Estambol, no arresivimos todos el jurnal, el diya mizmo de su aparisyon, lo ke es muy normal. Konsiderando de este punto de vista, devo dizir ke una partida de los ke bivimos en la Kosta Evropea de muestra sivdad, semos un poko mas privilejyados! En mirando de esta ventana, mos vyene al tino, tambien los abonados (lektores) ke biven afuera de Turkiya.
Eyos en jeneral resiven muestra gazeta despues de kaji una semana. Ya se keridos amigos, ke munchos de entre vozotros estariyash pensando ansi: “Al pareser ke Coya se olvido ke aktualmente egziste una teknolojiya ke se yama Internet!”. Naturalmente ke no me lo olvidi. Munchos, en esta manera alkansan a muestra gazeta el diya mizmo. D’akordo, ma no todos... Enfin, pasaremos a otro sujeto.
Estamos aserkando de los diyas final de las Fyestas. Pensi de no alesharme muncho de los sentimyentos ke mos dan las fyestas. Kualo de mas apropiado de avlar sovre la AMISTAD? Ay personas ke se keshan de sus soledad sentimental o amikal. Keridos lektores, puedesh imajinar ke egzisten personas del kontraryo? Se keshan de no tener tyempo para eyas, tanto son akaparadas por sus ovligasyones sosyal i munchos amigos!
Devemos admeter una koza. Tenemos una tendesya a kalifikar komo Amiga (o Amigo), a una simple relasyon o konosimiento. Naturalmente, en la vida tenemos un grande menester de amigas, de amigos. En una manera, es la insufizensya de muestra persona, o puede ser la soledad ke mos aze bushkar la Amistad. A mi opinion, una amistad i lealdad. Amigos… puedemos tener munchos. Pasamos el tyempo, azemos konversasyones, kambiyo de ideas o de opinyones, lo ke es muy normal.
Ma, la amistad verdadera no es solamente sempatizar o pasar el tyempo endjuntos. Es muncho mas. En el pasado ya aviya eskrito dos artikolos diferentes sovre este sujeto. Aki, kero transferar otruna vez la dicha de un pensador: La Amistad verdadera no es komerse de parte a parte, ma tener ambre endjuntos. Ke definisyon ermoza!”
Keridos amigos, porke razon kije otruna vez azer un artikolo ke, mas o menos ya tengo echo sovre el mezmo sujeto? Bueno, antes unos, dos diyas par azardo sinti la bien konosida kantika de Carole King, pedaso intitulado “YOU’VE GOT A FRIEND”. (Tienes un Amigo). En los byervos de esta melodiya yo sinti otruna vez la ekspresyon pura de la amistad, de la lealdad. Pensi de tresladar i relatar estos versos tan sinyifikativos. Naturalmente en dinguna poezia tresladada o adaptada no se puede alkansar al grado del orijinal. Portanto, ize un esforso para kedar lo mas posivle fidela al mesaje de Carole King.
TIENES UN AMIGO
Si estas kon apreto de korason, abatido,
Si nesesitas un poko de amistad i kudyo,
Kuando para ti nada kamina derecho,
Serra los ojos, pensa a mi un momento,
Estare de vista a tu lado.
Apenas ke syento tu yamada,
Por aklarar tu eskura nochada.
Invyerno, primavera, enverano, otonyo,
Lo ke tienes de azer es yamar solo.
Estare a tu lado, tienes un amigo…
