Haye Sara

Arivando Avraam a Beer Sheva, i sintyendo la muerte de su mujer en Hevron, se va a Hevron por yorarla i endecharla, i mirarle su rijo. I syendo savia Avraam ke en este luguar, la meara ‘MEARAT AMAHPELA’, el lugar onde estan enterrados Adam Arishon i Hava su mujer, se kijo azer patron de este lugar, i apropyarselo por lugar de enterramyento para el i su famiya.

Entonses, los patrones de este lugar eran los ijos de Het de la famiya de Kenaan. Sovre esto se aderesa Avraam onde el Kapo de eyos un syerto nombrado EFRON por tratar sovre esto.

Efron, seya ke kijo azerle una buendad le dize a Avraam ke se emposese de la meara sin ninguna paga. Avraam refusa de resivir este regalo i lo merka la dicha Meara kon 400 kintales de plata fina, delantre de todos los personajes de la sivdad.

Despues de esto, enterro Avraam a su kerida mujer Sara en esta meara kon grande onor. I asistyeron a sus funerayes todos los grandes personajes de akel tyempo.

Pasando 7 diyas de dolyo, mando Avraam a su ijo Yitshak onde Shem i Ever para ke deprenda ley i sensya i estuvo ayi tres anyos. I Avraam se torno a Beer Sheva.

Despues de unos kuantos diyas, muryo Avimeleh, rey de Gerar, a la edad de 103 anyos i fue Avraam akompanyado de muncha djente a Gerar por konortar a la famiya i delantre de el enreynaron a su ijo en su lugar, i lo nombraron Avimeleh sigun uzo de el pais, i torno Avraam a Beer Sheba.

Kuando se izo Yitshak de 40 anyos, yamo Avraam a Eliezer, su esklavo fidel, i kapo de su kaza i le enkomendo ke fuera a la tyerra de Aram Naorayim, onde moran la famiya de su padre, i ke tome de ayi una mujer para su ijo Yitshak i lo akavido bastante de no tomarle mujer de la famiya de los Kenaanim donde el mora entre eyos. Entonses Avraam teniya 140 anyos. Eliezer sin perder tyempo izo sus aparejos i partyo para Aram Naarayim a la sivdad ke morava Nahor, ermano de Avraam. El Kriyador le ayudo a Eliezer, estuvo en su favor por amor de Avraam i Yitshak, i arivando a Harran topo sovre la fuente ke aviya en la puerta de la sivdad, a la ninya Rivka, ija de Betuel, inyeta de Nahor. Indo a kaza se dyo a konoser ken era el i ke era su misyon. Kon su kontentes la mandaron kon Eliezer. Yitshak resivyo a Rivka i vyendo su buena natura i sus buenas ovras, la yevo a la tyenda de su madre i la tomo por mujer.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın