Keshki

Desde ke empesi a eskrivir en Judeo-Espanyol seya en el Shalom, seya en El Amaneser, ize diversos i diferentes tekstos. Munchos de akeyos tekstos no los tengo porke se aviya deteriorado mi primera komputadera. Entervalo, paso anyos i myentres arrezyi mi manera de pensar, de emplear los byervos ansi ke mi manera de ver la vida. I, ke azardo! este teksto lo esto eskrivyendo a la luz de mi mueva edad.

Keshki, un inosente i chiko byervo ordinaryo ke puedemos tresladar komo: Si saviya!.. Syempre, debasho de este byerviziko, vash a topar un regreto. No se puede enyegar ke es la pura ekspresyon de un arrepentimiento. Este sentimiento difera asigun las personas. Personalmente, yo no topo muy sinseras las personas ke pretenden kedar detras de todo lo ke azen o dizen i adjustan ke no azen nada, de kualo se van arrepentir un diya. Keridos lektores, yo penso ke el umano dize o aze i en vezes no aze una koza ke deviya azer. Es normal i en la natura de la persona.

Solamente, en syertos kavzos se topa remedyos de adovar; se puede tornar del yerro, lo ke da un fuerte sentimiento de afalago. Munchos bivimos este modo de eksperyensas i dizimos KESHKI! Los espesyalistos afirman ke, el arrepentimiento es una ekspresyon de regreto ke, en vezes puede ser muy fuerte si no ay remedyos de tornar atras. En vezes es tambien un regreto por alguna koza ke no se izo o no se disho. Es komo dizir: “Las kozas ivan a ser diferentes si se aziyan de otra manera o no se avlava este modo.”

Asigun los espesyalistos, si se trata de un kavzo importante, el regreto puede provokar en la persona una tempesta psikolojika komo por egzempio, espanto, nyervozidad, en vezes un sentimiento de verguensa, de konfuzyon ets.

El regreto es un sentimiento komplikado i munchas vezes danyozo. Ay vezes ke parese mizmo inutil. Porke, si ya akontesyo lo ke akontesyo, alora deke tanto sufrir tanta dezolasyon? Keridos lektores, no es yo sola ke esto demandando esto. Son los psikologos. La sola koza pozitiva pueden ser las lisyones ke se toman, si se reushe a tomar! Se puede demandar esta kestyon: “Es ke ay remedyos de prevenir las konsekuensas kon un sistema de otokontrol? Aki es un espesyalisto ke responde: “En una mezura penso ke si. Las reaksyones de la persona son subjektivas i dependen de la umor en la kuala se topa en akel momento. Kon un refleks espontaneo, puede komportarse sin djuzgar, sin pensar a las konsekuensas. Malorozamente, se enkontran munchos kavzos semejantes en todo modo de entornos.”

En la mezura de las posibilidades antes de tomar una desizyon, se rekomenda de bien djuzgar, de kalkolar los rezultados probavles. Afilu, si el kavzo no es muy urjente, se puede bushkar remedyos de atrazar. Es muy posivle ke, kon un meoyo repozado se puede topar una manera de resolver el problema. En jeneral, de una manera o otra, se puede topar la solusyon de munchos problemas. Es una kreensa optimista ke da apoyo i fuersa moral. Personalmente, yo tengo esta kreensa.

 I en vezes mos peryemos aryento de dudas, semos indechizos i no savemos kualo azer. Si reelmente savemos lo ke keremos, estamos seguros de ke keremos, despues de aver bien djuzgado, yo penso ke devemos estar bien prontos a tomar la responsabilidad de muestros aktos. A lo menos es una esperansa de no arrepintirmos despues.

No esto dizyendo ke es syempre muy fasil i tan simple. En la mezura de las posibilidades, antes de tomar una dechizyon, seriya rekomendavle de kalkolar los rezultados probavles. Si ay remedyo de remeter a mas despues (siguro si no es muy urjente), es muy posivle ke, kon el ayudo de un meoyo repozado se topa la repuesta o la manera de resolver el problema. En jeneral, komo lo afirmi mas antes, de una manera o otra se topa la solusyon de munchos problemas. Asigun mi, esto es una kreensa optimista ke da apoyo i fuersa moral i tambien esperansa. Metyendo el punto final, sueto a todos los amigos i lektores diyas kon el minimum de frazas ampesando kon el byevo “keshki”.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın