Una Memorıa De Hanuka

Dora NİYEGO Judeo-Espanyol
6 Aralık 2017 Çarşamba

Ekstrakto (Alıntı) DORA NİYEGO

Era un dia de invyerno, en el anyo 1940. No mos aviya kedado lenya de kemar en el Getto ande estavamos bivyendo en la Polonya. Oras i oras asperi en la kola para merkar un poko de lenya ma komo kada vez, torni a kaza de muevo kon las manos vaziyas. En el kamino me estuve delantre un monasteryo. De asperar oras i oras en el friyo, tenia las pachas duras komo piedras. Pensi, si entro aryento puedeser me puedo kayentar un poko. Soni la soneria, un papaz me avyo la puerta i me demando si estava ambyerto. Ya avia unos kuantos dias ke no metia nada en boka, ni mizmo un pedasiko de pan. El papaz entendio ke tenia ambre, me yevo a una baraka ande estavan biviendo los puerkos, i me disho de asperarlo aya.

Akel diya, por la primera vez, me enseli de los puerkos. No se estavan espantando de los soldados Almanes. “Porke el Dio no me izo naser un puerko?” me demandi de mi para mi.

 Alevanti los ojos, el papaz me estava mirando kon ojos tristes. Tenia en la mano un chini de supa de patatas. Eskapi la supa en un punto, dainda no me avia artado, ma no savia komo dizirlo al papaz. Lo remersi, i le demandi si me puedia topar un echo en el monasteryo. “Si akseptas de echarte kon los puerkos, toma esta eskova, i empesa a alimpyar esta baraka,” me disho el papaz.

I ansina empesi a lavorar en el monasteryo. Kada dia, a los puerkos, los estava konosyendo mas muncho. Pensi ke los puerkos son mas kerensyozos i mas buenos de la djente de afuera.

De vez en kuando, me estavan yamando a la eglisya para ramplasar un ijiko. Este echo me estava plazyendo porke me estavan dando onor. Ma i de otra parte, estava pensando ke lo ke estava azyendo es ipokriziya, porke no es djusto para un judio de detener en los brasos el portreto de la Santa Maria. Por esta razon, entre los mushos estava repetando todas las orasiones de la Tora, finke se eskapava la orasion en la eglisia.

Estavamos en el mez de Disiembre. Empesi a sentirme muy desrepozado. No me estava puediendo olvidar las noches de Hanuka ke pasavamos en la kaza de mi nono. Noche i dia, la melodia de los biervos de la orasion de Hanuka me estavan pasando por el tino. ”Bizmoshe Hanuka abaim le David...” Me se avia echo una idea fiksa i no me lo estava puediendo olvidar. Si puediya asender solo una kandela en dizyendo los biervos, puedeser ke me iva repozar.

De vez en kuando, en pasando delantre la eglisia, estava pensando de meterme en la aldikera una kandela de aya. Ma despues estava pensando ke no es djusto de arovar.

Una noche, en serrando las puertas de la eglisia, me apersivi ke el parafin de una kandela estava koryendo. Pensi ke este parafin mas no les va valer para nada, tomi el parafin ke koryo, i me lo meti en la aldikera.  Agora ya me iva pueder azer una kandela.  Ma ande la iva asender esta kandela?

Akeya noche de pensar, oras i oras, no pude durmirme. En mi esfuenyo, mi padre me estava yamando: “Tu sos el chiko de la famiya, ven asiende esta kandela.” Enduna me esperti, en viendo los puerkos, empesi a yorar. Esto no puedia kontinuar ansina. Me alevanti, i empesi a bushkar un lugar para asender la kandela. Ariva de la eglisya, avia una eskalera ke se suvia para alimpyar la chimeneya. Pensi, si suvo esta eskalera, dingunos no me pueden ver aya. Suvi la eskalera, kiti la kandela de la aldikera, i la asendi. Empesi a resitar la orasion de Hanuka. Aya dingunos no puediyan verme ni oyirme. Me estava paresiendo mi nono estava al lado de mi. Todos los suvenires orozos me estavan pasando por los ojos. Akel punto, las paredes altas del Geto, el friyo, la ambre, todo se desparesieron. I una vez otra me konsenti ke era un aniyo de la kadena judia (Yahudilik zincirinin bir halkasıyım).

Tanto me embevesi en los suvenires ke no oyi las patadas ke estavan aserkando detras de mi. En supito uno metio su mano enriva de mi ombro, i enduna me esperti de mi esuenyo. Esta mano era la mano de Peter. Peter era un miembro de la eglisia. Del primer dia, las miradas de Peter no me avian plazido. Todo me estava espantando ke me iva dar en mano. Enduna me abolti, i le dishe: “Si, yo so judio. Aki me eskondi, i komi de tu komida. Agora vate i yamalo al Gestapo, mas nada no tiene una valor por mi.”

Lagrimas empesaron a korrer de los ojos de Peter. Unos kuantos puntos estuvimos kayados: yo asperando kon kuryozidad, i el yorando. Despues me disho: “Ven asienderemos la kandela endjuntos,” i empeso a dezir la orasion de Hanuka. Los biervos en Ebreo, i la melodia los savia muy bueno.

Akel punto, las dos solombras en la pared se ataron una kon otra, i se izieron una grande solombra.