Los Tapetes De Seda De Kumkapı

Judeo-Espanyol
13 Aralık 2017 Çarşamba

Dora Treves

 

Oy vos kero kontar de una ekspozisyon muy enteresante de tapetes antiguos, ke esta tomando lugar en el Muzeo de Ovras Turkas i Islamikas (Türk ve Islam Eserleri Müzesi) en Sultanahmet. Estos tapetes muy raloz de seda son yamados “Tapetes de Kumkapı” porke fueron teshidos en los atolyes de Kumkapı por los maestros Ermenis ke vinyeron de Kayseri i se aresentaron en Estanbol a la fin del 19en siglo. Eyos izyeron los tapetes para el Palasyo Otomano i para venderlos afuera del payis. Ma achakes de la situasyon negra ekonomika de akeyos anyos no uvo merkadores i a poko a poko se serraron estos atolyes. La muncha parte de estos tapetes fueron teshidos entre los anyos 1834 i 1930.

Agora estos 55 tapetes ekspozados ke son de muncha valor apartyenen a la koleksyon del Armator Turko i ombre de negosyo de Izmir ke se yama Lucien Arkas. Los maestros tapeteros son: Zareh Penyamin, Agop Kapucuyan, Garabed Apelyan, Avedis Tamiscian i Tosunyan. Estos tapetes teshidos kon seda i iloz de plata i en syertos kon ilos de oro son inestimables, no se pueden dar presyo. Por darvos una idea, en syertos tapetes se topan 2.560.000 anyudos en un metrokare. Ya vos imajinash kon ke grande pasensya i amor se formaron.

Kaji ke me enkanti de ver los elefantes, los dragones, los liones kon alas, los tigres, las kreaturas mitolojikas, syertos reptiles, leopardos, kavras, motifes florales, nuves chinas, motifes otomanes hatayi i rumi. Todas estas kriyansas ke me estan mirando en la kara lo ke paresia ke me kerian avlar, saltar i salir afuera del tapet tanto naturel i bivyendo.

 En el salon se esta amostrando dos filmos donde el uno mos esta eksplikando la estorya del empesijo de tapetes i en el otro filmo un famozo vendedor de tapetes Avedis Avak, mos esta kontando un poko de la estorya i de la vida de los tapeteros maestros.

Esta ekspozisyon va durar fin a la fin de este mez. No peryesh de ir i ver. Al vermos.