Batya Natan

Vaera

En la perasha de Vaera meldamos las yagas ke trusho El Todo Poderoso a los Ejipsyanos. Las syete yagas estan mansyonadas en la perasha de esta semana i las tres ultimas en la perasha de ‘Bo’.

En el entervalo de un anyo, mando El Kriyador dyez yagas una mas fuerte ke otra a el Ejipto. En primero se trokaron las aguas del Nilos en sangre, i muryeron los peshkados del riyo. Despues se muchiguaron en el riyo las ranas, i salyendo despues de la agua, kavzaron munchos danyos en la tyerra. Despues se konkriyo en todo el Ejipto unos piojos de una manera muy danyoza. Mas despues arivo a el Ejipto unos animales krueles ke kevrantaron muncho a el puevlo. Despues uvo una mortaldad terrivle en las kuatropeas ke izo muncho danyo. Una negra sarna les vino a todos los Ejipsyanos asta no pueder suportar. Despues uvo un buen pedrisko ke danyo todos los frutos del kanpo. Despues les mando la langosta ke danyo todo lo sembrado. Despues les mando El Todo Poderoso una fuerte eskuridad ke turo tres diyas i tres noches de una manera ke los izo kevrantar muncho, syendo no se puedian menear dinguno de su lugar. Todos estos males fueron suportando Paro, en tal de estar en su kapricho i no mandar a los Djudyos de su tyerra.

Lo ke aze maraviyar es, kuando se apezgava la fortaleza de la yaga sovre el i su puevlo ya paresiya ke se iva ablandar su korason i ya prometiya de dar la libertad a los Djudyos.

Apenas kalmava la yaga i teniya un poko de repozo, tornava a su negro, i se enduresiya su korason. De esta manera suporto Paro, i todo su puevlo estas 9 terivles yagas. Los Djudyos ke se topavan en mizmo lugar kon los Ejipsyanos era una grande maraviya ke no teniyan ningun mal.

La dyezena yaga, el (Makat behorot) no pudo suportar asta el kavo, i se le ablando su korason, despues de sufrir bastante ke todos los ijos mayores (behorot) de los Ejipsyanos, sin diferensya de chiko a grande, fin el ijo de Paro, muryeron todos de una.

Fue forsado Paro de porte todo su puevlo de yamar a Moshe, a Aaron i rogarles ke salyeran eyos i todos los Djudyos del Ejipto, i ke rogaran por su vida.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
485