Alhad ultimo, mi ijo me bushko en dizyendo ke su mujer esta lavorando i ke kere azer un dezayuno kon mi en un kafe de Beşiktaş. I yo siguramente aksepti kon grande plazer esta envitasyon. Mos topimos i kaminando en las kalejikas estrechas de Beşiktaş, entrimos a una ande aviya solo mansevos i mansevas avlando, burlando i riyendo.
Veramente fue un plazer de ver esta manseves kon karas riyentes. Malorozamente oy no estamos puedyendo ver estas karas, tanto estan lavorando dia i noche sin tomar suluk, fin de semanas, shabates i alhades, en los dias de fyestas…
Ke tengan shans buena i ke sus kaminos seygan illuminados de luz para pueder estar orozos en este siglo muy diferente en todo modo de punta de vista.
Despues de dos oras de sohbet mos fuimos a vijitar el “Deniz Müzesi” (el muzeo de Mar) ke se topa djusto en el sentro.
Es el muzeo el mas grande ke se topa en la Turkiya sovre el kampo de marina (denizcilik alanında). En mizmo tyempo kontyene una diversidad de koleksyon i por esta kavza es enumerado en los muzes del mundo entero.
Los barkos (tekne) protejados komo una djoya, los fonksyonaryos mostrando el kamino, konstruizado en un espasyo de 15.000 metros kares, kon paredes muy altas i un salon kon un panorama ekstraordinaryo del Bosfor… De una parte los barkos de Atatürk, de otra parte los marineros turkos famozos en la istorya.
Las ovras ke ay en este muzeo: Armas de gerra, bandyeras, las barkas de los reynados (saltanat kayıkları), oras diferentes, las uniformas de los marineros, barkos istorikos, mapas (harita), modelos de barkas, kampanas (çan), ediktos (fermanlar), manuskritos (el yazmaları), medalyas, armas, fotos i munchas otras kozas…
20.000 ovras se topan en este muzeo enteresante.
Una arma es un sinyo distinktivo (ayırt edici) ke apartyene a una famiya, a un rey, a una sivdad. Los Otomanos utilizaron munchas armas para mostrar sus poderes.
A la fin mos fuimos a un kafe para repozarmos un poko i mos espartimos kon muncha alegriya del dia ke pasimos endjuntos.
