El Amor, no son palavras ke se dizen Al azar, por un momento i sin pensar. Son estas otras kozas ke se syenten, Sin avlar, al sonreir, al abrasar. JULIO IGLESIAS
En unos kuantos diyas se va fyestar la St. Valentine, ke aki konosemos komo el Diya de los enamorados. A esta okazyon kualo de mas apropriado ke unas kuantas linyas sovre el Amor? En realidad, ya se avlo, ya se eskrivyo bastante i se va eskrivir dayinda muncho mas.
Keridos amigos i lektores, no se si savesh ke ay tambien el Diya de los selibaterios ke se fyesta el 15 de Febrero, en Inglez “Singles Day. Lo aviya meldado en un jurnal etranjero antes muncho tyempo. EspeAro ke no me esto yerrando. En jeneral, ay doz alternativas delantre los mansevos i muchachas: Kazarsen, fondar una famiya o kontinuar una relasyon sentimental(si tienen).
“Porke, El AMOR a vezes nunka yega, porke pasa sin yamar… Se va, bushkando a ken avlar. I a vezes kuando yega, yega tadre, porke ay alguno a su lugar.
El Amor, el Amor, el Amor… El Amor no save de frontieras, de distansyas, ni lugar; no tyene edad, puede yegar, piedrido entre la djente o en un kantar.
El Amor es pedronarse todo, sin reproches i olvidar para volver a komensar…
Es no dezirse nada i, en silensyo kaminar… Es ofreser sin esperar…
Keridos lektores, kije tambien terminar este teksto, asigun lo empesi, kon los versos de Iglesias. Kualo de mas apropiado para el Diya de la St. VALENTINE?
