La triste estorya de un poeta djudyo ke eskrivyo el Imno Nasyonal de Israel: Naftali Herz Imber

La triste estorya de un poeta djudyo ke eskrivyo el Imno Nasyonal de Israel: Naftali Herz Imber

Naftali Herz Imber fue nasido en 1856 en una chika sivdad de Galichya estonses parte del Imperyo Austriako. Imber tomo estudyos Talmudikos i Kabalistikos i sovre estos estudyos i a la okazyon ke Bukovina se auno al Imperio Austriako el eskrivyo un poema i el Emperador Franz Jozeph lo aregalo por este fakto. Malgrado ke en akeyos tiempos no se estava uzando a eskrivir en la lingua ebraika, el eskrivyo en esta lingua. Kuando se izo de 19 anyos el se espartyo de Galichya i se metyo a viyajar el mundo. Se topo en Estanbol ande izo la konosensya del diplomato Sir Laurence Oliphant i mizmo lavoro kon el komo su sekretaryo personal. Sir Oliphante era kristyano, mistiko ke apoyo kon entusiazmo a ke los djudyos retornen a la Tierra Santa. Despues de un tiempo, kon Oliphante endjuntos se instalaron en Yerushalayim. En 1886, Imber publiko el livro de poemas ke se entitula “Barkai”. En este livro publiko el poema “Tikvatenu” (Umudumuz) donde el se inspiro de los primeros ke izyeron aliyah. Este poema en primero fue el imno de los siyonistos i despues se aksepto komo el imno nasyonal de Israel, “Hatikva”.

Imber viyajo muncho. Se fue a la Evropa, bivyo un syerto tyempo en Londra, viyajo a la India, i a la fin en 1892 se aresento en Los Estados Unidos. A Imber lo konosiyan komo “El Borracho Vagabundo Ebraiko”. Estando en Los Angeles el disho ke despues de 50 anyos se iva fondar el Estado Israelyano i en el futuro las kazas i las personas se van a kayentar kon la enerjiya del sol. I esto es lo ke se realizo tanto el era profetiko Talmudiko i Kabalistiko i futuristiko. Ma komo munchos artistos i savyos i el teniya un grande problema. El era alkoliko. Por esto era nombrado komo borracho. El syempre bivyo en provedad ma era un umanisto verdadero. En Boston lo yamavan “El Rey Djudyo de Bohemia”. Despues de bever bastante empesava a meldar sus poemas. El ke era un poko ekzotiko i orijinal, kreiya ke el era el verdadero padre spiritual del siyonizmo. Diziya ke kaliya arekojer el puevlo i aunarlo. Komo de fakto i esto se realizo. Teniya grande kreensya en el Talmud. Weizman, Ben-Gurion i Golda Meir fueron muy kontentes de adjustarlo a Imber en la Galeria de Los Grandes Siyonistos.

Aparte ke fue el kreador de “Hatikva” Imber izo traduksyones de Omar Khayyam al ebreo. En 1909 en NewYork a la edad de 54 anyos en grande provredad, mos desho la buena vida. Dospues ke fue enterrado en Los Estados Unidos, en el anyo 1953, su funeral fue transportado a Yerushalayim i agora se esta repozando en Har HaMenuchot konosido komo el simeteryo Givat Shaul. Ke su alma repoze en los verdjeles de Gan Eden.

Keridas i keridos al vermos en serka kon sanedad en alegriyas i fiyestas. Ya se esta aserkando Pesah. Empesaremos a inchir los yeladores ondos kon las prasas eskaldadas, las espinakas, las berendjenas asadas i las dulsuryas de almendra i muez.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın