Reseftas de Pesah

Dora TREVES Judeo-Espanyol
21 Mart 2018 Çarşamba

Keridas i Keridos,

Pesah ya se esta aserkando. Es la fyesta ke fyestamos kada anyo el 10 Nisan a la djudiya por ke el Dio salvo a los djudyos del esklavaje de Ayifto. No vos va kontar su estorya de antes 3000 anyos porke esto my sigura ke en el Şalom ya se va eskrivir. Al lugar de esto vos va dar reseftas de gizados de Pesah donde la una es “Pastelikos de karne molinada/pikada (kiyma)”, lo ke me ambezi de mi defonda kerida madre Ester ke este en Gan Eden. La otra resefta es un chishit de dezayuno dulse de matsa kon frutas.

Pastelikos de kiyma:

Ingredientes: 1 sevoya. 250 gr kima. Una kucharika de chay de sal. Una kucharika de chay de pimyenta. Una kuchara de agua. Un punyado de pirishil. 3 matsas. Un guevo. Lo ke areyeva de arina de matsa. Un punyado de muez molinada grande sigun al dezeyo. Azete para friyir.

La sevoya se korta i se sofriye fina ke toma una ermoza kolor i se ablanda. Se adjusta la kiyma i se kontinua a sofriyir. Despues se mete la sal, la pimyenta, el pirishil i una kucharika de agua. Se koze un poko fina ke la kiyma troka de kolor i se ablanda. Se serra la lumbre i al guste se adjusta la muez.  De otra parte se mete en mojo 3 plakas de matsa. Kuando ya se ablandaron se eskurren i se esprimen bueno bueno. Kon la mano se amasa i se echa un guevo, sal i arina de matsa fin a ke se forma una masa ke vyene a la mano i ke se pueda avrir komo la masa de borekas.

La masa se avre a la mano, se mete el gomo aryento i se serra. Mi madre las formava redondas komo chinikos de kave. Mi kosfuegra Lizet las forma komo bimuelikos; yo las formo komo kubbes. Despues estos pastelikos se friyen en azete. La savor asemeja un poko a ichli kofte ma muncho mas ermozo i mas savrozo. I se kome kayntes kayntes kon gana i savor i beraha i afilu se kome i los dedos tanto savrozo es!

Vinyendo a la matsa dulse del dezayuno: se toma 2 plakas de matsa se parten en pedasikos chikos. En una tavayika se mete un pedasiko de manteka, enriva se mete los pedasikos de matsa se aboltan kon una kuchara. Enriva se adjusta 2 guevos batidos kon leche, una kuchara de asukar, kanela (tarçın). Se friye un poko. Se mete en un plato. I enriva se mete frutas freskas komo narandja (portokal), frezas, mansana, miel, muez u marmelada de la ke se topa en kaza.

I al lado se beve un chayiziko u un kafiko.

Salud i beraha ke vo se aga i para kada anyo ke mos ayege el Dyo a fyestar el Pesah kon sanedad, repozo de alma, parnasa buena, guste, sin mankura de dingunos ni mankura de biyen, estaremos todos djuntos i aunados.

Al vermos.