Keridas i Keridos,
Esta semana vos kero kontar sovre la Kreasyon de un Milagro (mucize): El Sentro de Perros para Siegos en Israel.
İmajinavos si no puediyash ver, imajinavos si no puediyash ser endependente de salir solos a la kaye u de viyajar solos. Para los ke no pueden ver, esto es un fakto, una realidad. Ma el Sentro Israelyano de elevar perros para las personas syegas esta kreando una realidad mueva: un milagro. Antes de la fundasyon de este sentro la djente ke teniyan menester de estos perros espesyales, los aziyan trayer de payizes estranjeros i mas muncho de los Estados Unidos. Kuando el perro viniya a Israel, las kalejas, los patines de las kayes, la djente, i komo esto munchas kozas komo era diferente dande el payis ke vinyeron, estos perros i los empleyadores se renkontravan kon muncha difikultad.
Oy agora este sentro en Beit Ovet en İsrael es el solo sentro akreditado enternasyonalmente en el Oriente Medio.
Noach Braun, el fundador i direktor de este sentro, dize “Damos servisyo para kada persona en Israel, sea Kristyano Arabo, sea Muzulmano u sea Djudyo; basta ke tenga menester de este perro.”
Yoav Ortov, el ensenyador de perros dize ke una persona es una persona, la relijyon no mos emporta. El ensenyador en primero ambeza al perro komo se va komportar, i despues al kliente komo se empleya el perro. Munchas vezes toma bastante tyempo para ke la persona i el perro se auzen el uno al otro.
Saleem Sherif es un syego israelyano arabo muzulmano ke mora en Nazareth. En su chikes ya viya un poko ma despues de la eskola primera el peryo su vista por entero i tuvo siempre menester de akompanyarse porke no se puediya debruyir solo afuera de su kaza. El keriya ser endependente i salir solo a la kaye i viyajar solo sin el apoyo de dingunos. “Grasyas al Dyo ke agora tengo a Winston ke es mis ojos”. Dize ke en su sivdad la djente no son uzados a engrandesersen i bivir kon perros i por esta razon se espantan de ser modridos i no se aserkan, ma kon tyempo esta djente ya se adaptaron a ver a Saleem kaminando kon un perro. Se puede dizir ke este sentro kompleto el suenyo de Saleem.
El byervo en Ivrit para perro ez “kelev” ke sinyifika “yeno de korason”. Achakes de estos perros el kliente aze munchas konosensyas, amigavles i muevas konversasyones. A estos presyozos perros les meten nombres estranjeros en Inglez komo Jonathan, Alexander, Michael, Winston, para ke kuando estan en la kaye ke no se les meskle el meoyo kuando oyen nombres en Ivrit.
Estos perros son eskojidos de Labrador u de Golden Retriever porke estas rasas amostraron ke son los mijores para esta ovra. Eyos son muy antrenables, sansibles, entelijentes, no se ajitan fasilmente i tyenen karakter kalmo, tyenen buenas manyas.
Dunke este chiko estado djudyo, chiko en kantidad, ma muy muy grande en kalidad esta trokando munchas vidas en bueno de mijor en mijor. Un perro a la vez es una vida.
Komo dizen: Ken salva una vida salva el mundo.
Al vermos para bueno i en bueno. Sanos i rezyos.
