Alüminyum Hurda Geri Dönüşüm

La Reushidad De Los Estudyantes Del Lise Ulus

La Reushidad De Los Estudyantes Del Lise Ulus

Keridas i Keridos,

Oy vos kero avlar de un evenimyento ke tuvo lugar la semana pasada i ke mos glorifiko muncho de meldar esta nuvela en munchos jurnales. I espesyalmente yo me glorifiki muy muncho por ke i mi inyeta tomo parte en esto ke vos va kontar. Esto es el amelyoramyento de un aparato ke se aplika al telephon selular i a la komputadora para evitar ke la kamera no pueda embiyar filmos u fotos en sekreto sin ke la persona se apersiva.

Esto fue la idea de los mansevos de la eskola Lise de Ulus, la unika eskola djudiya en el payis ke estamos bivyendo. Estos mansevos presyozos en primero fondaron una firma ke se nombra Blixed para pueder lavorar komo una fırma seryoza. Eyos fueron nominados finalistos de parte de “La Fundasyon de Turkiya para la Edukasyon Junior” (Turkiye Genç Başarı Eğitim Vakfı). I fueron envitados de la parte de “El Fuar del Komerso Turko” (Türkiye Ticaret Fuarı) para ke partisipen a este fuar para ke agan konoser sus produktos i para pueder venderlos i ke la ganansya se trasmetera komo dono a la fondasyon Tohum de Otizm.

Estos presyozos mansevikos i mansevikas mos eksplikaron ke “Ya ay 5 anyos ke estamos lavorando soto la direksyon de los profesores konsultantes. Al presipyo de este anyo fondimos muestra firma i empesimos a pensar kualo puedemos azer de inovasyon ke puedra sirvir a la buendad de la umanidad. Uno de entre mozotros disho “Ya savesh ke a todos mos estan suivando sin ke mos apersivamos, mizmo en este momento” i sovre esta idea tomimos kamino en mano de azer un modo de aparato ke evitara ke la persona no se suiva en empleyando seya el telephon selular seya la komputadora. Kuando ya mos desidimos en este sujeto, aparejimos eskizes, se formo munchos ensayos (deneme) en las eskrivadoras 3D (printeres), se aparejo kartelas para anonsyar a ke la djente konoskan este produkto, se travo un chiko filmo para amostrar komo se uza este aparato. I finalmente entre 50 finalistos ke partisiparon de Estanbol, fuimos eskojidos entre los 10 primeros” En este entervalo estan dando fuersa a tener entrevistas kon sponsores para ke les apoyen. El buto de estos mansevos es de dar ganansya a los apoyadores i de donar el resto de la ganansya a la Fondasyon de Otizmo.

Kol ha kavod.

En el 12 del mez de Mayo va aver el final de Turkiya ande van a kompetir kon 30 grupos del payis entero. En el final van a kompetir en las kategoriyas de “La mijor stand, la mijor vendida/merkansiya, el produkto mas inovator i la mijor firma.”

Agora dizime, komo ke no me guste i me glorifike ke mi inyeta esta en este grupo. Mashalla a todos i a todas. Les auguro buena reushidad. Ke seyan guadrados de ojo malo (nazar), ke esten siempre adelantados, siempre de mijor en mijor kon rankontres buenas.

Esperando de avizarvos nuvelas buenas del final.

Al vermos.

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın