Kualo es la majiya de las karikaturas de Charles Shulz?
Los personajes ke estamos rankontrando en las karikaturas mos estan akodrando de mozotros mizmos o de otras personas ke konosemos. Las karikaturas mos estan amostrando una variedad de karakteres umanos.
Munchas vezes dizimos: ‘A kualo va servir de aprovar otra una vez? Ya aprovi munchas vezes. Ya se entendyo, no va pueder ganar’. Dizimos ansina, ma aprovamos de muevo. Semos komo Charlie Brown, ke no gano ni un djugo de baseball en sinkuenta anyos ma no se kanso de aprovar de muevo. Munchos de mozotros puedemos identifikarmos kon Charlie Brown. Kontinuamos a aprovar asta ke a la fin ganamos.
Konosemos muncha djente ke son arogantes, grandiozos i dominantes komo Lucy. Estos son los karakteristikos ke puedemos ver fasilamente en los otros ma no en mozotros.
Puedemos identifikarmos kon Linus. Linus es bueno i mira a kalmar a todos kuando ay una tormenta en la kaza. La solo koza ke lo deranja es el komporto de Lucy, la ermana grande de Linus. Lucy lo ensulta kontinualmente. Linus es un adikto, ke no puede fonksionar sin su manta de seguridad.
La superestreya Snoopy (el perro) ekspresa profundos sentimentos de inferioridad: “Si yo era umano, si keriya puediya tener un perro”. Snoopy se fuye a la fantasia, i se imajina ser un piloto de kaza.
Konosemos tambien personas ke siempre echan la kulpa enriva de otros, les viene difisil de akseptar sus kulpa. Peppermint Patty esta echando la kulpa enriva de Charlie Brown por sus notas negras ke toma en la eskola. “Deviyas de ser una buena enfluensia para mí” le dize a Charlie Brown. Peppermint Patty es haragana, ma eya esta eksplikando la razon de sus negras notas otro modo: “Los maestros nunka dan buenas notas a las kreaturas ke tienen narizes grandes’’.
Charlie Brown no se utilizo por dinguna animasion o filmo kuando Charles Shultz estava en vida. Este komiko rompio un terreno ineksplorado kuando salio por la primera vez. No era una “soap opera”. No era una aventura. Era la realidad de la vida. Aviya materializmo, romansa, relasiones de famiya, anksiedad, relijion, desepsion, todo modo de koza ke se rankontra en vida. Charles Shultz lo izo kon umor i de una manera ke el lektor puede identifikarse kon los karakteres. Personas de ocho anyos fina ochenta anyos toman grande plazer de meldar Charlie Brown.
Kuando Charlie Brown salio en medio, la Segunda Gerra Mondial se aviya eskapado i la televizion estava aparesiendo. Charles Schulz entendyo ke puediya komunikar ideas komplikadas a personas de todas edades. Schulz teniya una kapasidad de eskrivir kon una forma presiza, ekspresando ideas en empleyando pokas palavras, i kon un estilo artistiko.
Kuando este komiko aparesyo por la primera vez en el anyo 1950 en siete periodikos, gano una popularidad grande. Sinkuenta anyos despues, aparesyo en 2,600 periodikos en el mundo entero i en 25 linguas diferentes.
