Batya Natan

Shelah Leha

Kuando arivaron los djudyos a el lugar nombrado kadesh Barnea, en los ‘kavos de el dizyerto Paron. Arivando a este lugar, ya estava el puevlo muy serka de la tyerra de Kenaan. I en pokos dias ya puedian entrar a la tyerra de Kenaan, la tyerra prometida del Kriyador. I Moshe Rabenu por konsolar a el puevlo, les dize, “Mis ermanos, ya vinitesh fin el monte Emor i el lugar ke el Todo Poderozo nos va darnos. Mirad ke vuestro Dyo ya vos apronto la tyerra delantre vozotros, suvid i apatronadvos de eya sigun la veluntad del Dyo. Sin myedo i espanto de nada”. Malorozamente el puevlo de akel tyempo no meresyo gozar de la tyerra bendicha, i por sus mal komporto se deperdieron i muryeron todos en akel dizyerto. Los djudyos sintyendo estas palavras de Moshe Rabenu, las entendyeron trokadas i pensan ke por en delantre no van a tener mas protejador, i es eyos kon sus fuersas i entelijensia ke tyenen de irsen a la tyerra prometida. I sovre esto se van todos sin regla i respekto onde Moshe Rabenu, i le dizen ke keren mandar eyos personas a esta tyerra porke eskulken i vean, i ke les avizen kual es el kamino ke van a tomar, i kualos son las sivdades ke van a sugiguar i se olvidan enteramente ke Moshe Rabenu, sus pastor fidel, esta kon eyos i ke esto todo no apartyene a eyos de pensarlo. Parese por el Dyo Santo no era muy difisil de abondonar sus ideas yerradas i no deshar ke mandaran eskulkadores a un lugar ke El les esta regalando. Ma, el Todo Poderozo topo konvinivle sigun su alto saver de no defenderlas esta demanda. Le dyo orden a Moshe Rabenu de desharlos azer su veluntad.

Solamente ke le enkomendo ke mandara dodje personas onoradas, kaveseras de el puevlo, uno de kada trivo i le enkomendo ke van a ver ke se lo digan a el i ke entyendan ke el sus kapo i sus rijidor. Moshe Rabenu izo el komando de el Kriyador, i tomo dodje personas uno de kada trivo, i los mando a la tyerra de Kenaan dizyendoles ke eskulken la tyerra i todos sus raportas, si es buena su klima o no, i la djento de ayi ke manera son, si son fuertes o flakos, si pokos o munchos, i las sivdades ke moran si son enkastelyadas, o son avyertas i les dyo a entender la direksyon ke tyenen de tomar, dizyendoles de pasar las montan yas por toparsen en la tyerra de Kenaan. Los eskulkadores en 20 de sivan salyeron a kamino, ke les anbezo Moshe Rabenu, i rodearon i eskulkaron la tyerra 40 diyas. A la tornada no trusheron un raporto favoravle sino ke deskorajaron a el puevlo. Por este kavzo, el puevlo Djudyo kedo en el dizyerto 40 anyos i la nueva jenerasion tuvo la ventura de entrar a la tyerra prometida.

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın