Viaje al sudeste de la Turkiya

La semana ke pasimos, kaminimos el sudeste de la Turkiya kon un tur ke muestro kerido amigo, Eli Arditi mos aparejo. El direktor del tur estava fantastiko. Mos ekspliko kada lugar ke vimos kon munchos detalyos. Los oteles ande mos kedimos estavan reflektando las karakteristikas de kada rejion. Vijitimos las sivdades Gaziantep, Şanlıurfa, Mardin i Midyat.

En Gaziantep vijitimos tambien la Sinagoga de la sivdad. El kerido Moris Levi izo avrir la Sinagoga por mozotros. Aparte de la Sinagoga, vijitimos el Talmud Tora, el Mikve i el Midrash. La komunidad judiya de la Turkiya, endjuntos kon el governo, la restoraron en el anyo 2012. La sinagoga paresiya mueva konstruida, komo si ke dainda bivieran judyos en la sivdad. Los judyos de Gaziantep ke biven agora en diferentes paizes, se arekojen de vez en kuando, vijitan sus sivdad nativa i azen orasiones en esta Sinagoga. En el anyo 1979, los judyos dalkavo de Gaziantep emigraron a Israel, i a Estambol.

Los primeros judyos ke se enstalaron en Gaziantep en la edad media, eran los judyos ke se fuyeron del egzilo de Babilonia. Una parte de los sefaradis ke se fuyeron de la engizision de Espanya se enstalaron tambien en Gaziantep. Setenta por sien de la komunidad judiya se pasavan en vendiendo lenjeriya a los kazalinos, i se okupavan de komersio. Las migrasiones empesaron en el anyo 1935. En el anyo 1931, aviya trezientas o kuatrosientas famiyas en Gaziantep. En el anyo 1978, solo sinkuenta o sesenta famiyas kedaron en la sivdad. Oy, ne kedo dingun judyo aya.

La tresera sivdad ke vijitimos fue Mardin. Muestro amigo Silvyo Ovadia mos rekomendo de vijitar la rejion ande los judyos bivieron. Le telefono a un mansevo de aya para ke mos yeve a esta rejion.

Una komunidad judiya egzistyo en Mardin desde la edad media asta el ventien siglo. En el anyo 1291, Abinadab B. Saadiah Halevi transledo Maimonides en arabo. En el katorzien siglo, un judyo de Mardin, Najib Al-Dawla, okupo un posto en el governo. En el dizimueven siglo, aviya kedado pokos judyos en Mardin, ma la vieja Sinagoga i los lugares sakros, komo la kaverna del Profeta Eliah, fueron prezervados munchos anyos.

Los judyos de Mardin avlavan ebreo, i se pasavan lavorando la tierra. El lider de los judyos era Mu’allim Moses. En el anyo 1904, la populasyon judiya era de 580 personas. Shehidiyye era el nombre de la rejion ande los judyos biviyan. Una vez a la semana, el diya de viernes, se establesiya un merkado en la rejion. En el ventien siglo, kuando el diya del merkado torno al Shabat, no kedo dingun judyo en Mardin. Todos los judyos emigraron a Nusaybin.

Kuando arivimos a Mardin, mos fuimos a ver las kazas ande los judyos bivyeron. Las kazas estavan blokadas. Mirimos del burako de yave de una kaza, i vimos una tableta kon una eskriturya en ebreo enriva. Deve de ser ke esta kaza era una Sinagoga. Del burako de yave, tomimos la foto de la tableta. Un poko mas abasho vimos una fuente de kaye. Mos disheron ke la yaman ‘ayn yahudiya’. Komo lo savemos, en el mundo entero, en kada rejion ande los judyos bivyeron, deviya de aver una fuente de kaye.

Este viyaje ke izimos fue delisiozo. Kaminar los muzeos, las kuevas, los merkados de kada sivdad fue muy enteresante por mozotros. Espesialmente, en Mardin ke no mos imajinavamos ke bivieron judyos, topar una tableta kon eskriturya en ebreo enriva, mos entereso muncho.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın