Treser Alhad de Junio, oganyo el 17 Junio, era el “Diya del Padre”. Mizmo si no es muy ansyano i este diya tiene un pasado i es orijinaryo de los Estados Unidos. Istoryanos afirman ke en la Roma Antigua egzistiya selebrasyones semejantes. Las estoryas son diversas, ya las tengo kontado los anyos presedentes. Oy kero avlar de jeneralidades, eskrivir unos, dos paragrafos diferentes.
Syempre tuve la impresyon ke el Diya del Padre kedo un poko en la solombra del “Diya de la Madre”. No son los padres ke kedan en la solombra, son las selebrasyones. El padre, idolo del ijo, primer amor de la ija, komo pueder kedar en la solombra?..
No me plaze muncho el titolo de “shef de famiya”, ke se da muy frekuente a los padres. Penso ke es en kontradiksyon kon la nosyon de igualdad entre los djenitores. Ma no ay dingun impedimiento al dizir ke el padre fue syempre el “pilar” de kaza, el simbolo de seguridad, i djuntos kon la madre, el giador i protektor de la famiya.
“.. Asigun syertas investigasyones i enkuestas, asta antes unos kuantos anyos, los padres pasavan kon sus kriaturas menos tiempo ke la madre i tomavan tambien chika responsabilidad en elevandolos i edukandolos.” Tengo dubios… Kero pensar ke izyeron las enkuestas en lugares yerrados! Es verdad ke syempre el padre fue el ke lavora, el ke “trae pan a kaza”. I la madre syempre fue la ke se okupa de los chikos en kaza. Porke muestras madres no lavoravan... Bueno, esto kedo leshos i no era una situasyon ke deteniya los padres, o syertos de okuparsen de la edukasyon, de la instruksyon de sus ijos. Antes 70 - 80 anyos afilu, yo lo bivi esto, mis ermanikos tambien. Syempre mi padre se okupo de mozotros, aun ke viniya kansado del echo. Ma devo atorgar ke no fue la mayoriya, la jeneralidad de los padres ke izyeron ansi. Lo djusto por lo djusto, oy estamos remarkando ke estan tomando una parte aktiva, al lado de la madre. En una manera, el rolo “tradisyonal” del padre ampeso a trokar. Klaro ke syempre es el “pilar”.
Todo en konservando estas kualidades, se enrikesyo i kon otras: ayudar en kaza a syertas okupasyones, ser amigo de djugo de los ijos, ayudarlos en las lisyones, azer spor, ir al mach endjuntos kon eyos ets... La relasyon pozitiva i amikal entre padre i ijos, es una asiguransa para eyos...
En instalando una disiplina i otoridad dura, estrikta, el padre lo ke puede sembrar es espanto en los chikos korasones. Ma aki en dizyendo ansi, no kero ke ayga malentendido. En avlando de relasyon amikal, esto no deve ser entendido komo deskararsen. A la kontra yo syempre pensi ke seya la madre, seya el padre deven konservar una doza de otoridad i no akseptar todos los kaprichos de sus kriaturas i sus mankuras de respekto. La kerensya de un padre, de una madre, son la luz ke arrelumbra el kamino de sus ijos.
