Azer konoser muestra kultura i muestra erensia

Silvyo OVADYA Köşe Yazısı
11 Temmuz 2018 Çarşamba

Oy vos va kontar sovre un muzeo i una aktivitad kultural. En la isla (Büyükada) tenemos un muzeo sovre la istoria i todas las aktivitades sovre las islas ke se topan muy serka de Estanbol. I kreo ke es el primer muzeo de este djenero (Kent Müzesi) en muestra sivdad. Una sivdad tan antigua i ke fue la kapitala del Imperio Bizantino i del Imperio Ottomano i ke tyene reelmente una istoria i una populasyon muy enteresante i no se topa un muzeo asemejante. Mizmo en la epoka del Imperio Otomano moravan muy diferentes grupos de personas en esta sivdad. 
 En el muzeo ke se topa en la Büyükada, antes de su avyertura, ize todo mi posivle para enformarlos sovre las personas enteresantes djudios/ias ke bivyeron en estas islas. Mizmo en mirando los livros sovre la arkitektura (mimari) puedemos ver entre munchos arkitektos gregos i unos kuantos djudios. 
 Era el enverano pasado ke el prezidente de la fondasyon vino i me demando komo puediyamos azer para mas konoser la egzistensya de los djudios de las islas en el muzeo. 
 I pensi lo ke puediyamos azer para realizar esta demanda? I avli kon los dirijentes de la Sinagoga Heset le Avraam para demandar si teniyan Sefer Toras “pasul” (geçersiz) i parohetes o mapas? Las Sefer Toras pasul las avian dado al gran rabinato. I las topimos. Aviya una kon las “ets” en dyentes de elefantes (fildişi). I las tomi para ver si las puediyamos reparar (tamir etmek). I kaminando i demandando vimos ke no eran dyentes de elefantes ma eran guesos i kuernos (boynuz) de gameos (deve). Ma el eksperto de estos echos me disho ke lo puediya reparar kon guesos i kuernos de vaka. I asperi dos mezes para ke los tope. I lo izo reelmente una maraviya. I despues kaliya azer reparar el parohet. I una damma ke lavora para los muzeos me lo konservo i me lo restoro. 
 Agora keremos konservar i restorar todos los parohetes, las mapas, i todo modo de tekstiles ke tyenen raporto (ilgi) kon las sinagogas. 
 Sovre el muzeo: plasaron en una verrina un Sefer Tora, un parohet i les ize regalo un puntero (okuma çubuğu). Estudyando del livro “Konseptos i Valores” “Kavram ve Değerler” eskrivi munchas kozas ke metyeron al lado de la vitrina. En la revista “Adalı” del mez de julio, metyeron un artikolo sovre esta vitrina rengrasyando la Fondasyon Heset le Avraam porke emprestaron estas valores para 3 anyos. 
Ayer en la Sinagoga de Abudara ke se topa en Hasköy i ke fue vazyada por la fondasyon de Hasköy, la Asosyasyon de Konservar la Erensya Kultural izo konoser una seria de livros ke fueron preparados por los miembros de la asosyasyon kon un fondo resivido por el Ministero d’Eksterior de los Estados Unidos. I en sesh diferentes sivdades izyeron bushkedades en las iglesias, hamames, sinagogas, eskolas ke fueron abandonadas dospues de la fondasyon del estado turko. El buto es de topar estas ovras. Kreo ke se topa miles de iglesias en este payis....
  De ke esta prezentasyon se esta realizando en la Sinagoga de Abudara? Porke malorozamente es un edifisyo ke parese a los ke vimos en diferentes sivdades. Es un edifisyo muy presiozo ke se topa en el sentro de Estanbol ma ke esta en una negra situasyon. 
 La Sinagoga d’Abudara va tener la posibilidad de ser vijitada por muncha djente.