Annie Cohen Kopchovsky fue la primera mujer de azer el torno del mundo kon bisikleta

Metin DELEVİ Judeo-Espanyol
11 Temmuz 2018 Çarşamba

En el enverano de 1894, una joven, espoza i madre, Annie Cohen Kopchovsky se suvyo a una bisikleta delantre de su kaza en el Estado de Massachusetts i empeso al torno del mundo.  Al lado se tomo dos u tres vestidos para trokar, un revolver (tabanca) kon mango de perla i un koraje “hutzpah” sin limito.

Porke Annie desho a sus tres ijos chikitikos i su rolo tradisyonal komo madre de kaza  para ir a esta loka aventura? Por ke le plaziya Londonderry Lithia Spring Water?

No, reelmente. Si, tomo el nombre Annie Londonderry i gano $100 para dar pozes kon un bokal de los mijores Whiskey de Londonderry. Tambien izo el reklam de munchos produktos diferentes i se le pago para dar pozes de fotos en viyajando en el mundo entero. Ma su aventura fue muncho mas ke topar sponsores i ganar muncho.

Annie kijo desfiar (meydan okumak)  las normas de lo ke las mujeres podían azer en la dekada de 1890. Se fue de Massachusetts a Nueva York, de Nueva York tomo el vapor para la Fransya i de aya izo el torno de la Evropa i de la Asia kon la bisikleta.  Se izo la mesajera (sözcü) del movimyento de la igualdad de las mujeres, de los imigrantes judíos en los Estado Unidos i del movimyento de derechos de votar de las mujeres.  I ademas, durante una grande parte de su viaje, kon grande koraje, al lugar de fustas se vistyo pantalones, una koza inimajinavle de la parte de una mujer en akeyos tiempos.

Manadero: 22 de julio de 2016 Jewniverse