Este teksto trata de una jeneralidad, de la Vida Profesyonal i Mundo del Lavoro. En una manera es rezultado de mis observasyones, i bushkidades desde anyos. No solo en el lavoro ma tambien en la vida en jeneral es bastante difisil de komunikar kon talas personas. Los primeros ke me vyenen al tino son los ke se keshan de todo, se ensanyan por un si, por un no, los ke se opozan a todo modo de idea, sin djuzgar, sin konsiderar los motivos, los ke pretenden saver todo ets... Lavorar kon talas personas, puede kavzar mizmo muestra desfecha.
Los espesyalistos dizen ke es kaji imposivle de pueder trokar el komporto de talas personas. Portanto, se puede adoptar una estratejiya para parvenir a somportarlos. Por egz: estableser una komunikasyon kon una persona ke kontinualmente pretende tener razon, se opoza a todo, se kesha del echo, de los kolegas, del friyo de la kalor!
Estos tipos de una manera reushen a topar faltas, ma no reushen a resolver problemas! No son de akordo kon dingunos. En kada etapa de muestra vida mos puedemos topar lado kon lado kon personas semejantes. Ma, kuando se trata de la Vida Profesyonal, la kestyon deviene un problema importante i seryozo. Es klaro ke kada dezavenimiento va tener un efekto negativo sovre muestra reushita, por konsekuensa, sovre la “rentabilidad” de la organizasyon tambien. La atmosfera de stres enfluensa negativamente el entorno, puede provokar sanya. I, kon una sanya mal kontrolada, no se obtiene rezultados pozitivos.
Un espesyalisto dize: “En todo modo de lugar puedesh enkontrar personas difisil. En muestra famiya, entre los amigos, afilu mozotros puedemos ser difisil. Alora, kale pensar dos vezes i bien djuzgar. Naturalmente no dezeamos kolavorar kon talas personas. Ma, en kavzo ke tenemos la ovligasyon de kontinuar muestro kamino kon eyos, devemos ambezar i pratikar syertas reglas fundamentales. Inyervarmos no es una solusyon. A la kontra, topar un remedyo de kolavorar i ser produktivos malgrado todos los inkonvenientes”.
En vezes vos puedesh topar en kolavorasyon kon una persona pretendyendo “saver todo”! Alora, lo ke tenesh de azer es profitar(!) de la okazyon en dandole una misyon difisil. Veremos komo va reushir. A lo menos por un syerto tyempo no le va salir la boz. Estad prontos a una sorpreza, ken save? Ay tambien probabilidades ke va reushir.
Supozando ke estash enfrente de un kolavorador ke se ensanya muy presto, vozotros devesh konservar vuestro kalmo. No es fasil de luchar kontra la sanya ma, vuestro kalmo puede darvos una superyoridad. Por kontra, si no reushitesh a topar el kamino derecho de luchar kon una persona difisil, muy probavle ke no vash a tener repozo en la atmosfera profesyonal.
Se deve afirmar klaramente ke el derredor profesyonal, el mundo del lavoro kolektivo egzija ayudo, apoyo i akordo resiproko de todos los elementos. En kurto, una atmosfera amikal. Me parese ke no es yerrado ni “hanefud” de mi parte, dizir ke esta atmosfera kordial reelmente egziste en Muestra Gazeta Şalom. En kada vez ke ago una kurta vijita, las amigas me azen sentir esta kordialidad, malgrado muestra grande diferensya de edad... Lo ke me aze muncho plazer...
