Compass doganbaruh

A una sierta edad no ay de asentarse en kaza

A una sierta edad no ay  de asentarse en kaza

La semana pasada estuve en una reunyon kon las amigas. Izimos un sohbet bueno de aki de aya. Ya mos paso un diya maraviyozo. El invyerno ya esta vinyendo. Desidimos de arekojermos mas muncho. Ma kada ves ke mos desidamos esto, nunka mos se fada. Esto, ya lo savemos todos. Deke? Savesh? Porke todos mozotros ya estamos topando unas okupasyones afuera del echo i de la famiya. A la jenerasyon muestra, les esta gustando demuevo azersen estudyantes.  Seya del internet, seya los kursos del belediye, seya de las eskolas. Si no es esto, ay varyantes okupasyones. Tures de un diya en el rededor de Estambol, o tiyatros, sinemas, kafes. Ya se esta topando. Dingunos no keren estar asentados en kaza. Lo importante es ke tengamos salud. Si la persona kere, para todo modo de budjeto, ya se esta topando kozikas. Antes sinkuenta anyos si una persona teniya sinkuenta o sesenta anyos, se diziya ke era vieja. Kon una kurula en la kavesa i en la mano ropas de brodar, se estava en la kyoshe del kanape asentadika. Gizar, limpyar la kaza, i arekojerse kon las vizinas para bostezar i brodar. Esto era la vida.

En muestra reunyon, todas kontaron al kual kurso o eskola van a ampesar. I yo kero kontarvos i a vozotros. Puedeser ke unos kuantos de vozos dayinda no oyo estas okupasyones i vos enteresa. Todos tenemos menester de ambezar de uno i del otro. Los primeros kursos son ISMEK. Es un organizasyon del Istanbul Büyük Şehir Belediyesi. Todos ya pueden topar estudyo sovre sus enteresos. Afilu de gizar, afilu de usar el internet. Vos rekomendo estos estudyos. https://www.ismek.ist/tr/default.aspx . Puedesh topar todo lo ke vos enteresa. Sin paras. Afilu si keresh azer jimnastik o pilates.

La Universita Nishantash en el Campus de Maslak avriyo un seksion para los ayedados de mas de 60. Se yama 60+ Tazelenme Üniversitesi. Debasho de las lesones estan dando arte, spor, salud. Ay atolyes sovre diferentes talentos. I sus objektivo es ambezarse todo una vida, komo el Ismek. https://www.nsantasi.edu.tr/HSayfa/tazelenme.html Esto es el adreso. Vos rekomendo ke miresh; voz va plazer.

La Universita Istanbul esta dando estudyos en el internet. Ken tyene una diploma de universidad tyene posibilidad de tomar una diploma mas de la universita de Estambol. Sin dar egzamen puede entrar. I empesar de muevo un estudyo akademiko. http://auzef.istanbul.edu.tr

Este anyo las Universidades kitaron de muevo una perdonansya. Kere dizir, ken no parvino de kontuneyar a la Universita ke se iva mas antes i lo desho, puede entrar de muevo. I yo entri de muevo. Antes de trenta anyos ke me asenti a los bankos de las klasas oy asentar de muevo me vino muy savrozo. En vezes las profesoras mas chikas de mi! I komo mi en la klasa unos kuantos elevos mas. El Dyo Poderozo ke me ayege de eskapar. I me dyeron un dokumento ke so eleva de la Istanbul Üniversite.  I me fui a tomar el paso al büro de IETT ke es en Tunel. El ofisial esta gritando. A los inyetos no puedesh tomar vozotros pasos. Kale ke vengan eyos. Akel momento i yo le amostri el dokumento miyo. Kon una kara me dize “A ken vaz a tomar?” “Es para mi”, le dishe. “Kuantos anyos tyenes?” “Yo no kero paso para ayedados”, le dishe, “so eleva. Kero paso para elevas.” Ya vos imajinash ke me engleni muncho. 

Keridos lektores. La vida no se save. Kada uno de mozos la salud ke mos de mano i mos vamos todo endelantre. Lo ke mos ambezimos, ambezaremos a los mansevos i mozos mos ambezaremos de eyos. Si no keresh azervos viejos, aze movimientos, komé poko, i salí afuera, i lavorá. Aze lo ke vos plaze. Agora kon Rosh Ashana entrimos a un anyo muevo kon muevos empesijos. Shana Tova, Hatima Tova i Hag Sameah.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın