La Primera Asamblea de los SHadarim de la ANL en Yerushalayim

Karen GERSON ŞARHON Judeo-Espanyol
17 Ekim 2018 Çarşamba

La Primera Asamblea de los SHadarim de la Autoridad Nasyonala del Ladino i su Kultura (ANL) tomo lugar en Yerushalayim, donde esta el seno de la ANL en los dias 11-13 Oktubre de 2018.

Para los ke no konosen la palavra, “SHadarim” kere dizir “ambasadores, emisaryos” i es una palavra ebrea antigua. Antes dos anyos, kon la inisyativa del Dr. Bryan Kirschen de la Universidad de Binghampton en New York, el Dr. Eliezer Papo i la ANL de empesar un grupo de los aktivistas del Judeo-Espanyol en el mundo entero. el kriterio el mas importante en eskojiendo los shadarim fue ke avlen el Judeo-Espanyol. Una persona, mizmo si es aktivista i aze muncho para la lingua, no pudo ser eskojida si no avla la lingua. Esto fue un kriteryo muy importante en la primera reunion. 15 shadarim de diversos paizes fueron eskojidos i 10 pudieron partisipar en la Primera Asamblea. De Argentina vinieron Liliana i Marcelo Benveniste; de los Estados Unidos vinieron Bryan Kirschen, el shadarbashi, porke fue su idea de empesar una kolektividad semejante debasho el techo de la ANL i Daisy Braverman; de los Balkanes vinieron Katja Smid, Berta Romano, Jagoda Vecerina; la Turkiya fue reprezentada por Karen Şarhon, Henri Çiprut i Can Evrensel Rodrik i de Israel partisiparon Fina Aronovitz, Sara Halfon Inbar, Albert Israel i Kobi Zarco. Para kada de estos grupos uvo una sesion de “meza redonda” onde kada uno de los partisipantes konto ke es ke estan aziendo en su paiz, ke ideas tiene para el futuro, komo pensa ke se puede kolaborar kon la ANL i todos los otros grupos para el adelantamiento del Judeo-Espanyol i tambien sovre proyektos komun ke pueden aunar a todos los grupos.

Tres dias muy intensivos pasaron bastante presto. Puedesh meldar detalyos de todo lo ke se avlo en El Amaneser de Noviembre. Lo mas importante de todo: todos avlaron el Judeo-Espanyol durante estos tres dias sin tomar rekurso a otras linguas, mansevo komo mas aedado, akademiko komo non-akademiko, todos ama todos avlaron muestra kerida lingua. Esto es por primera vez ke afita en un kongreso paresido! Ke viktorya para el Judeo-Espanyol.

Munchas rezolusiones fueron tomadas en estos tres dias. Vo las va dar a konoser a poko a poko en kada semana, despues ke muestro shefe, Bryan Kirschen las denomina a todas. Ama por el momento vos dire ke la Turkiya amostro ke mueva sangre ya egziste aki. Dos mansevos maraviyozos, Henri Çiprut i Can Evrensel Rodrik reprezentaron muestro pais kon mi i todos los prezentes admiraron ke bueno estavan avlando el Judeo-Espanyol! Agora ya puedemos tener aftaha ke va aver una mueva jenerasyon ke remplasara la muestra. Ke alegria!

 

 

Siz de yorumunuzu yapın

Tüm Yorumları Görün