Selin Toledo
La demanyana del 24 de Noviembre, pizi la tierra de Van por primera vez en mi vida, kon otras diez personas ke tambien venian desde Estambol. Esperavamos ke iva ser muy yelado ama al yegar i salir del aeropuerto, mos saludo un sol ke kemava. Mos resivio un sinyor mansevo yamado Fatih ke era nativo de Van, i suvimos en una araba preta ke mos yevo a todos los sitios durante muestros dos dias aki.
Muestra primera parada/durak era la izla de Ahtamar. Pasimos enfrente el Lago Van para yegar a la izla en una barka yena de otra djente, inkluzo un grupo de Armenia. Vijitimos la famoza Iglesia de Surp Haç i oyimos su istoria. Al pasear en la izla, lo ke mas me fasino fue la vista enfrente: el lago del kolor grizo-blu ke parese una mar i las montanyas blankas ke suven detras, akodrandomos “aki es el limite”.
I ken eramos mozotros? Ke aziamos tan leshos, en la otra punta del payis?
Eramos un grupo de mansevos Djudios, Armenios, Gregos i Asirios, en kamino a la ultima aktividad de “Tanıtma değil Tanışma Atölyesi” komo parte del Proyekto Yanyana de Rumvader. Mizmo ke se izo en otras sivdades komo Samsun, Antep, Kayseri i otras; ivamos a azazer una aktividad para konosermos kon los mansevos universitarios de Van i avlar sovre la kondisyon de ser una minoria en Turkiya.
Ansi, pasimos el primer dia vijitando Ahtamar i despues otro monasterio ermenesko muy viejo arriva la Montanya Erek, ke estava en muy negra kondisyon: Monasterio de Yedi Kilise. Ariento avia un tefter de vijitantes, yeno de eskritas en diferentes linguas: turko, ermenesko, arabo… I agora en Djudeo-Espanyol tambien, ke adjusti yo.
El dia sigiente teniamos la aktividad, ama antes, el shabat por la noche, se mostro el filmo de Yanyana i despues deskuvrimos la sivdad de Van de noche. A muestra sorpresa, esta sivdad tenia una vida nokturna muy viva kon munchos bares i muzika. Ansi ke mozotros tambien gozimos un poko de este plazer antes de eskapar el dia.
El alhad por la manyana, fuimos a YYÜ Teknokent ande mos enkontarimos kon los estudiantes del Yüzüncü Yıl Üniversitesi Toplum Gönüllüleri. Mos ambezimos los nombres de todas las personas djugando i a poko a poko izimos aktividades mas konsentradas en konosiendo muestras kulturas diferentes, i problemas ke enfrentamos diariamente achakes de ser minorias. Tuvimos diskusyones muy produktivos ande se kreo una empatia sinsera. Munchos de los estudiantes komentaron ke sus djuzgos trokaron i ke les plazeria saver mas de muestras kulturas. Al final del dia, los estudiantes i mozotros de Estambol no mos keriamos ir. Mos dimos munchos abrasos i dishimos adio; ekspresando muesta esperanza renovelar esta eksperiensa.
La vijita a Van no solo troko opiniones ama tambien korasones.
