Ken eran los sponsores del viyaje de Kristof Colomb? Por seguro los djudios.

Judeo-Espanyol
9 Ocak 2019 Çarşamba

La reyna Isabel de Castilla i el rey Ferdinand de Aragon son, sin dubyo, los monarkos los mas famozos de la istorya espanyola. Fueron los sponsores del famozo viyaje de Kristof Colomb (aunke no son muy famozos i amados en la istorya djudia, desharon lavorar en libertad la Inkizisyon en la Espanya i ekspulzaron a todos los djudios).

La istorya, malgrado ke se yama sensya, no es syempre lo ke parese. Kristof Kolomb en primer lugar prezento su proyekto a Isabel i Ferdinand. Los monarkos espanyoles no se apresuraron para apoyar la demanda ke se les presento, malgrado ke el objektivo prinsipal de Colomb era de bushkar i topar un kamino kurto por la India i ansi ganar un avantaje en el komersyo enternasyonal de espesyas, i todo esto por la bolsa de los monarkos. En realidad, el viyaje istoriko de Colomb nunka podria aver tenido lugar si no ayudavan los djudios iberikos.

Si bien numerozos djudios (inkluido Don Isaac Abrabanel) ayudaron a topar los fondos para la ekspedisyon de Colomb, dos “konversos” (djudios ke se konvirtyeron al kristianizmo ma ke menteniyan en sekreto sus erensya djudia, tambien se yamavan marranos / anusim) aseguraron una razon fundamental para obtenir del apoyo del rey: Luis de Santangel, ministro de finansas de Aragon, i Rafael “Gabriel” Sanchez, trezorero de Aragon. Estos dos ombres resivyeron letras identikas de Colomb en la primer partida de letras ke embiyo.

Se le atribuye a Luis de Santangel el fakto de aver finalizado el argumento para konvenser la reyna Isabel para ke apoye i sostenga a Colomb, en dizyendo ke, en ayudando a Colomb a yegar a la India, la reyna podria promover la difuzyon del kristianismo en estas tyerras. Syertos spekulan ke en verdad el motivo de Santangel era la esperanza de ke durante estos viyajes, Colomb iva topar un refujyo seguro para los djudios, porke en estos tyempos la vida de los djudios en Espanya se estava azyendo mas difisil en kada diya ke pasava. Un otro fakto importante, una grande ironiya, fue ke los ordenes eskritas de Isabel para el viyaje de Colomb se firmaron el mizmo diya del edikto de la ekspulsyon de los djudios. El 2 de Agusto de 1492, diya de Tisha Be’av 5252, barkas yenas de djudios sefardis, ke biviyan i ke fueron ekspulsados de la Peninsula Iberika, salyeron de las aguas espanyolas. La flota de barkos de Colomb empesaron el viyaje un diya despues de Tisha Be’Av del anyo 5252, el 3 de Augusto 1492.

 

Siz de yorumunuzu yapın

Tüm Yorumları Görün