Si no vinish este Alhad, lo vash a regretar!

Karen GERSON ŞARHON Judeo-Espanyol
6 Şubat 2019 Çarşamba

Ya ay unas kuantas semanas ke estaos eskrivyendo, sea Silvyo sea yo sovre el maraviyozo Dia del Ladino/Judeo-Espanyol ke estamos organizando para este Alhad el 10 de Febrero en la eskola djudia. Un program yeno de maravias, empesando a las 11 de la manyana asta las sinko de la tadre. Por la manyana vamos a tener las avlas interesantes i tambien de riyir de muestra djente. Va ser muy interesante para todos de ver komo unos mansevos ke se estan interesando en muestro lingua, Selin Toledo i Can Rodrig Evrensel van a avlar en Judeo-Espanyol. El tema no es importante. Lo importante es ke estos mansevos estan avlando. Ke alegria va ser de verlos avlar. Estan muy emosionados porke para Selin por egzempio, va ser la primera vez ke va avlar en publiko en esta lingua! Ke emosyon! Ama la mizma emosyon la tenia kuando eskrivyo un artikolo para el Şalom por la primera vez en su vida en Judeo-Espanyol. I muy bueno reusho. Esto sigura ke i esta vez va reushir muy bueno. Para mozotros es una grande felisidad de ver a los mansevos avagar avagar empesar un kamino ke los yegara a tomar muestro lugar en el futuro. Yo tengo muncha esperansa.

Para muestra komunidad, sea en Turkiya, sea en el mundo entero, una aktividad es reushida si ay de komer! Si no ay komer, no te viene dingunos. Esto es lo mizmo por ande vos vash en el mundo entero. Por esto Alhad vash a komer a las mil maraviyas de las komidas ke vos va aparejar el kerido Meir Robelyu. Esta vez vos estamos dando mas muncho tiempo para komer porke entremientres vamos a aparejar la sala para el teatro ke va empesar despues de komer. En realidad, no es una piesa de teatro entera ma mas un skech porke dura komo 35-40 minutos ama vos dire ke estos 35-40 minutos vos va indjidar las karas de tanto riyir! Mizmo mozotros, los aktores, de tanto riyir uvo dias ke no pudimos djugar.

I por eskapar este dia maraviyozo, vash a sintir a Cenk Rofe kon su program espesial para este dia “ROFESPANYOL”. Solo va kantar en Judeo-Espanyol i en Espanyol, kantikas famozas i populares i komo siempre kon su boz ekstraordinaria.

Si keresh vinir, kale ke apartesh lugar porke vamos a enkomendar komida. Si no estash en muestras listas no vash a pueder entrar porke no va aver komida para vozotros. Para apartar vuestro lugar i asegurarvos ke vash a pueder entrar, telefoná a Emel Benbasat 0555 59563 58 / Karen Şarhon 0542 4258176.

Al vermos este Alhad si el Dio kere.

 

Siz de yorumunuzu yapın

Tüm Yorumları Görün