Eliz Gatenyo
Israel mando a la luna una nave de espasio. Esto es un grande sukseso en el mundo entero. Ya se ke todos van a eskrivir sovre este evenimyento, seya teknikamente seya politikamente, ma yo kero eskrivirvos sovre un rekuerdo a este propozito, ke me akodri.
El 15 Junio 1969, los Estados Unidos mando una nave espasial a la luna, kon los astronotes Neil Armstrong, Michael Collins i Edwin Aldrin aryentro. Akel tiempo no aviya dainda televizyon en la Turkiya. Lo estavan dando en la radio i todos mos arekojimos al entorno para oyir si van a reushir o no? Ya abasho? No abasho? Estavamos kon muncha merikiya siguro… djusto akel momento ke no ampese a yorar mi ija ke ya se ambreyo? Mi ija la grande ke teniya apenas un mez, topo la ora de ambreyarse. Le digo aspera un pokitiko! Nada! No uvo remedio, deshi a Neil Armstrong kon su problema i me fui a aparejar el biberon. Ansina peryi de oyir “el paso chiko para Armstrong, ma el paso grande para el mundo”.
