Eliz Gatenyo
Kuando mi ermanika i yo eramos chikas, lo bueno muestro era de asentarmos ensima las piernas de muestro padre para ke mos konte konsejikas. El teniya mil i una konseja para kontarmos, seya konsejikas konosidas o seya konsejikas ke enventava en akel punto.
Entre estas konsejikas, lo mas ke mos plaziya eran konsejikas de Hamavram el bovo.
Konosesh a Hamavram? Hamavram es una figura komo Djoha en el folklor sefaradi. Ma me parese ke el nivel de la entelijensya de Hamavram es un poko mas basho ke el de Djoha.
Vos kontare una konsejika de El.
La madre de Hamavram se iva ir al banyo. Lo yamo al ijo i le disho: Mira ijo de la madre, me esto indo el banyo, mira ke no deshes la puerta sola… Si Mama! le disho Hamavram i la madre salyo de kaza.
La madre se lavo se almisklo i salyo del banyo. En supito eya kualo ve? Hamavram delantre del banyo, en la mano teniya la puerta de kaza. Ya se incho de males la povereta mujer. Kualo es esto Hamavram? le demando al ijo. Hamavram le respondyo. Me enfasyi de estar en kaza, kije salir a la kaye, ma me enkomendates ke no deshe la puerta sola, i yo kiti la puerta de su lugar i la tomi kon mi.
Ke dizish? Djoha es mas bovo o Hamavram?
