Eliz Gatenyo
No se komo me chafteyo al ojo, vide un artikolo en ivrit ke amostrava los tefilines ensima de una kavesa de eskeleto. Pishin me enteresi i ampesi a deshifrar biervo por biervo el artikolo.
Era un artikolo eskrito en una revista medikala por investigadores chinesos.
Ken no konose las algujas chinesas, la AKUPUNKTURA? Los chinesos toparon siglos antes un modo de sanar hazinuras en topando puntos emportantes en el puerpo umano. Kada punto koresponde a un organo i dieron numeros a estos puntos. Kon algujas espesyales se aktivan estos puntos para sanar la parte del puerpo ande tiene problemas.
Los investigadores medikales toparon tanbien ke desde munchos anyos mas atras de las akupunkturas, los tefilines teniyan la mizma misyon. El artikolo dize ke Tefilin es una antigua resefta de puntos de akupuntura para la klaridad mental. Los tefilines de la kavesa i de la mano se pozan egzaktamente ensima de los puntos de akupunktura ande se meten las algujas, para purifiar las ideas i ennalteser la spiritualidad.
Komo eskrivi mas ariva, los puntos de akupunktura koresponden kon los lugares ande se meten los tefilines. Estos son:
YIN TANG: Es el punto ande se mete el tefilin de la kavesa, en medyo de la frente, entre las dos sejas. En aktivando este lugar kon las algujas, aze pasar las dolores de kavesa i repoza los ojos kansados.
HE GU: Es el punto de ensima la mano, entre el primer i sigundo dedo. Por aya azen pasar el stres i dolores de biskueso, tanbien dolores de dientes. Es tanbien uno de los lugares por ande pasa el kordon del tefilin del braso.
SHOU SAN LI: Es el punto serka del kovdo ke aze pasar la diarea i dolor de ombros. Por aya pasa uno de los 7 tornos del kordon del tefilin del braso.
NEI GUAN: Es el punto de ensima del puso. Aze pasar los enguyos de las prenyadas i de los dezrepozos del estomago. Por este punto tanbien pasa el kordon del tefilin del braso.
ZHONG ZU: Es el punto de entre el dedo mas chiko i el dedo anular de la mano. Por aya azen pasar las dolores de espalda i del bel. Despues ke se arodeyan los kordones al braso, el resto se arodeyan por aya.
En la Tora eskrive, “vas a meter este sinyo bendicho entre tus ojos i en tu braso”. Kon el tefilin en la frente, pensando en El vas a sintir un repozo en tu alma, i kon el tefilin en el braso, vas a akodrarte ke kon braso fuerte mos kito Ashem de Mistrayim. Inkreyivle!
