3 semanas antes, en el 15 de Marso egzaktamente, afito un atako kontra dos meshkitas en Christchurch, la kapitala de la Mueva Zelanda. Dospues de esta matansina, el mundo entero, djudios, musulmanos, kristiyanos, sin distinksyon de relijyon, se alevanto en pies para gritar sus indignasion kontra este akto inumano. I ansi mos akodrimos de la egzistensya de esta sivdad.
Kuando una persona se demanda ande es la otra parte, Mueva Zelanda es el primer lugar ke mos vyene al tino. Lo ke la djente puede no saver es ke mas de 6,800 djudios biven en la Mueva Zelanda oy en diya, prinsipalmente en Auckland i Wellington.
Al empesijo del siglo XIX, los djudios britanikos piyoneros se topavan entre los balineros (los ke apanyan balinas), misyoneros djudios i komersantes ke se fueron a eksplorar la Mueva Zelanda. No egzisten rejistros de djudios en la Mueva Zelanda de antes de 1831, la data kuando Abraham Hort Senior empeso a imajinar la Mueva Zelanda komo una posivle komunidad i payis djudia para los djudios inglezes endijentes i para los djudios oprimados de la Europa del Este. En 1843, partyo de Londra i arivo a Wellington, ande kon el konsentimyento i el apoyo del Gran Rabinato Britaniko establesyo una komunidad djudia. Se asosyo kon David Isaacs, ke sirvyo komo mohel (praktikante de la sirkonsizyon ritual), shohet (pratikante del degoyo kasher) i hazan. En las letras serializadas en los jurnales djudios de Londra de la epoka, el Sr. Hort Senior konto la difikultad de mantener una komunidad djudia en Wellington, keshandose de la inutilidad de mantener un minyan i mantener los komersos djudios serrados en Shabat.
Munchos de los djudios ke vinyeron a la Mueva Zelanda para bushkar oro en la Australya en medyo de la dekada de 1840, despues de un tiempo, no topando lo ke bushkavan, partyeron a bushkar este famozo oro en la Kaliforniya. Los ke se kedaron fueron rekompensados por el deskuvrimyento de oro en 1861 en la zona rural de la Mueva Zelanda, leshos de los sentros mas urbanos de Wellington i Auckland. Vente anyos despues, se promulgaron restriksyones de imigrasyon, ke defendyo la entrada a la Mueva Zelanda de personas ke no eran sivdadinos del imperyo inglez. Estas leyes se aplikaron afilu despues de la Shoah, i munchos de los sovrebivyentes no pudyeron imigrar a este payis. El 27 de Julyo de 1950, ke koresponde a 13 de Av 5710, la Mueva Zelanda rekonosyo al Estado de Israel. Algunos sostyenen ke el apoyo de la Mueva Zelanda al estado djudio era motivado por su dezeyo de enkorajar a los refujiados de la Shoah a ir a Israel en lugar de la Mueva Zelanda.
En los 20 – 25 anyos de alkavo, djudios de Israel, Sudafrika i del vyejo Union Sovietiko empesaron a imigrar a la Mueva Zelanda. Durante un grande rash en 2011, una Kaza Chabad en Christchurch fue destruida i fue rekonstruida kon el apoyo de fondos internasyonales. Este anyo, la komunidad djudia de Wellington selebra su 175 aniversaryo, 10 anyos mas antes del 175 aniversaryo de la primera sesyon del parlamento de la Mueva Zelanda.
