Selin Toledo
El viernes pasado, 29 de Disiembre, el koro Dafnes, un koro feminino formado basho el Metropolito Grego Ortodokso de Tarabya en Marso del 2018 i dirijido por Elena Mudiri Hasitou, dio un konserto en Saloniki komo parte del Kinto Festival Internasyonal de Koros del Munisipio de (Kapıcılar-Hortaç).
El koro Dafnes resive su nombre por el arvole sagrado del Dio de la muzika Apollo en la mitolojia grega i sus miembros son mujeres d’Estambol ke tienen niveles muy variadas de formasyon muzikal i de la lingua grega. Sus repertorio tiene kantikas de un amplio espektro de estilos ke reflektan la tradisyon muzikal Bizantino/Grego i Otomano/Turko kon orijenes jeografikos diversos komo Trakya, Estambol, La Egea, Kapadokia, El Mar Negro… Las kantikas vienen kantadas majoritariamente en grego, ama tambien kantan kantikas en turko i ermenesko. El koro va akompanyado por los muzikos Fotini Asineth Kokala en kanun, Ali Ağrı en ud, Hristos Psomiadis en el kemenche de Estambol, Pamir Panya en ney i Elena Mudiri Hasitou en perkusyon.
Desde su formasyon en Marso del 2018 , el koro Dafnes dio tres konsertos mas en el pasado; dos en el Sismanoglio Megaro (el Consulado Jeneral de Gresia) i uno en Mudanya komo parte del kinto atelye del Interkambyo Mudanya.
En el festival del viernes en Saloniki las Dafnes performaron sinko kantikas entre kualas la famosa Συ που ξέρεις την καρδιά µου (Si Pou Kseris Tin Kardia Mou) / Uzun Ince Bir Yoldayım en las dos linguas, una kantika ermeneska tradisyonal de Bingöl yamada Παράπονο - H ξενιτιά (Parapono - I Ksenitia) kon letras i en grego i en ermenesko, i otras tres en grego: Ένα τραγούδι απ›τ›Αλγέρι (Ena Tragoudi Ap’t’Algeri), Απάνω στην Τριανταφυλλιά (Apano Stin Triandafilya), i una kantika d’Estambol: Καροτσέρη τράβα (Karotseri Trava).
