Eliz Gatenyo
Oy vos kero avlar del estilo de arkitektura Bauhaus. Este Bauhaus siguro no es el Bauhaus ke vende klavos i martiyos etc.
Este anyo el movimiento de arte de Bauhaus fiesta su siyenten anyo. I por esto en Weimar Alemanya se va avrir un “Museo de Bauhaus”. Kualo es Bauhaus? Bauhaus es un movimiento de arte ke ampeso en 1919 en la sivdad de Weimar en Alemanya. Este arte es un total de pintura, arkitektura, eskultura i artisania. El fondador de este movimiento era Walter Gropius. Walter avryo una eskola de arte i aya ambezo a sus elevos ke “ofisyo de arte” no egziste. Un artisto es un artizano ke se developa.
Los primeros profesores de esta eskola eran Itten, Schlemmer, Kandisky i Klee. En 1928 Gropius demisyono de su posto de direktor i desho su lugar a Hannes Meyer. Meyer era un arkitekto. En el program de arkitektura de la eskola el ambezo un estilo ande los tejados eran derechos. I esto fue el simbolo de la arkitektura moderna. El i sus elevos desidaron de akel diya en delantre ke ivan a aplikar este estilo en sus konstruksyones.
En lo ke ampeso la presyon de los Nazistos, los profesores i los elevos se fuyeron a la Amerika. I de aya a se fueron a Israel.
Meyer i sus 17 elevos arkitektos ampesaron a ensenyar en la fakulta de konstruksyon de la Universidad de Tel Aviv. Este estilo ke ensenyavan era muy simple, teniya formas kares o rektangulos sin dingun motivo, sin dinguna flor etc.
Ansina, desde 1931 asta 1956 se fraguo mas de 4000 kazas en estilo Bauhaus en Tel Aviv. La emportansya era dada a los balkones i a las tarasas.
A Tel Aviv, dieron el nombre de “La sivdad Blanka”. Porke todas estas kazas i konstruksyones eran pintadas kon una meskla blanka.
En los anyos de alkavo ampesaron a renovar estas konstruksyones para rehabilitarlas. Puedemos verlas en los Bulvares Dizengoff, Nordau, Rotschild, Nahmani i Montefiore. Tanbien si vos asentash en un Kafe en Nahalat Binyamin, puedesh admirar i egzaminar este arte en las kazas del entorno.
A la kontra de las konstruksyones de el 16en o 18en siglos (estilo Barok etc.) estas konstruksyones son muy simples, derechas i sin ornamentos, ma malgrado esto son muy estetikas.
En 2003, “La Sivdad Blanka Tel Aviv” se enkorporo a la lista de “Patrimonyo Mundial” por UNESCO, i esta rejyon se tomo basho de proteksyon.
