Muy Keridos Korelijionarios,
Este anyo fiestamos el “Pesah” djuntos kon el “Shabat” i nuestra alegriya esta redoblada.
En el “Seder de Pesah” resitando la “Agada” kon nuestras famiyas, serkanos i kon nuestros korelijionarios todo en eksperimentando konsensiozamente sovre propio nuestras almas la salvasyon del kativeryo de Ejipto de nuestros abuelos sigun esta eskrito en la “Agada”, “Hayav Adam Lirot Et Atsmo Keilu U Yatsa Mimitsrayim”,
i vamos prezentar nuestros rengrasiamentos al El Todo Poderozo ke nos ayego a estos diyas: “Baruh Şeehiyanu Vekiyemanu Veigiyanu Lazeman Aze”
Komo ya lo savesh bien “Pesah” komo “Hag Aaviv/Fiesta de la Primavera” nos apregona el renasimiento de la natura. Esto es una nueva fuersa, nueva enerjia i una nueva animasion. Esto es el tener buenas esperansas verso el avenir i estar siguros por el futuro. Esto es tanbien la fuersa de superar sovre todas las inkonveniensias de lo pasado. Espero ke no mankaresh de valorizar el “Pesah” i por esta parte.
Keridos Ermanos,
“Pesah” tanbien nos kondukta de edukar nuestras nuevas jenerasionesverso nuestra fe i nuestra kultura.
“Veigadta Levinha Bayom Au”.
No ay dubyo ke el manadero prinsipal de esta edukasion es la famiya.
Tambien no kale neglijar el rolo de nuestra eskola i nuestras asosiasiones i sovre todo el rolo del Talmud Tora kon los kuales mos glorifikamos. Espero ke no mankaresh de estimular vuestros ijos i ijas a estas institutiones.
Muy Keridos Ermanos,
Siendo ke semos una kolektividad en tendensya de amenguar komo populasion i tomando en konsiderasyon las kondisyones ekonomikas ke se estan apezgando, es sierto ke se deve de dar una grande lucha i mentalidad de abnegasyon en todo modo de senso para pueder mantener las institusiones i ovras de nuestra komunidad. Viendo los lavoros infatigables de nuestros diridjentes ke versieron sus tiempos i sus enerjias kon abnegasion donde los rengrasio i los agradesko una otra vez. Penso ke meresen vuestro apoyo en todo modo de senso.
Esto bien siguro ke ya tenemos munchas razones de tener buenas esperansas verso nuestro futuro. Siendo yeno de estos pensamientos i sentimientos vos sueto un buen “Pesah” kon vuestras famiyas i todos vuestros serkanos todo en bendizyendovos kon todas las bendisyones de nuestra Santa Tora.
Shabat Shalom.
Hag Pesah Sameah
Rav İsak HALEVA
(Gran Rabino)
