El Festival Internasional de Kuentos i Konsejas se fiesto en Estambol

Esti SAUL Judeo-Espanyol
30 Nisan 2019 Salı

La komunita judia fue invitada para kontar en muestra lingua ansestral tradusido en Turko.  Suzet Herman, Şeli Gaon, Forti Barokas i Henri Çiprut suvyeron en shena. Ayer, sovre demanda, se repeto en muestro Muzeo i tuvo sukseso. Anna Eskenazi prezento la aktivita sosyal i kultural. Aki tenesh su prezentasion.

Onoravle asistensia, Senyoras i Senyores,

Oy va ser para mozotras, las kuatro Djohas, un momento muy espesyal. Es dizir ke kuando desidimos de prezentar “Djoha’’ no teniyamos tantos datos para estar seguras ke puediyamos yamarmos, las unas a las otras ‘Djoha’.

En unos kuantos puntos, kon una kurta prezentasyon de las raizes de Djoha i su filozofiya profunda eskondida en las dichas i anekdotas, i en los momentos simples diarios, todas i todos van a sentir ke kada una i uno es ‘Djoha’ a su manera.

Ansina, agora vamos a arimarmos a muestras siyas, i vamos a konoser a ‘Djoha’, kaji eskondido en las almas de todos.

Djoha tomo diferentes nombres a traves la jeografiya mundial: Nasreddin Hoca - Nastrazzi - Cuha - Yoha - Djuha son unos kuantos de sus nombres en ovras konosidas de diferentes paizes. Para mozotros, “Kel Oğlan” es tambien un simbolo semejante. La rais de Djoha, de su egzistensya, se puede enkontrar en una ovra anonima en el dyezen siglo. El karakter Djuha fue mesklado kon Nasreddin Hoca, i Nasreddin Hoca fue la persona prinsipal de la tradisyon umoristika en muestro pais.

Las karakteristikas de Djoha son komo mil estreyas ke briyan en el sielo. El puede ser tratado komo puro djudyo para los djudyos de avla ladino / judeo-espanyol, i toma munchos otros nombres sigun el pais i la lingua ke se avla.

Djoha es sentimental, el es el simbolo del mal tratado, reprezenta al ombre de la vida de kada diya, kon todos sus defektos i kalidades.

Djoha djuga al bovo kon una intelijensya ke mos aze ver la realidad.

A vezes es kurnaz, espierto, a vezes es mas ke derecho i es el egzemplo de la onestedad, de la buendad, de la bovedad i a vezes de la ironia.

Reprezenta al riko komo al prove de manera muy realistika. Todo esto se eksplika a la fin de los kuentos i de las dichas en una manera umoristika inesperada i en un estilo bien simple.

Karakteristikas de Djoha no se eskapan, porke se salva de todos los akontesimientos de una manera diferente ke mos aze a la vez riir i pensar.

En jeneral, Djoha, kon sus aktos de atitud de djente ke dizen: “Es de la buena parte”, save eskonderse detras de todas las situasyones malas, i ansi el final de sus konsejas se terminan bastante bien por su kuento. El satir, el umor, la riza, el absurdo, las aksiones naivas sirvieron munchas vezes komo armas de defensa de los poko dotados para trionfar en la vida diaria.

Djoha el bueno, el malo, el satan, el andjelo, Djoha el loko, el sezudo, Djoha ke tiene siempre una nota final muy personal, yena de surprizes ke refletan el lado umoristiko i filozofiko de Djoha el universal.

 

 

Siz de yorumunuzu yapın

Tüm Yorumları Görün