Forti Barokas
Keridos lektores, antes 15 diyas tuvimos una ekspozisyon en el muzeo djudyo. Esto sigura ke ya meldatesh las novelas del diya nombrado “LAS KUATRO DJOHAS”. Las kuatro djohas eramos Anna Eskenazi, Şeli Gaon, Süzet Herman i yo, Forti Barokas.
Yo konti una konseja reel, veramente ke paso en el sentro Balat munchos anyos antes i plazyo muncho i la kije partajar.
Al tyempo en el sentro Balat morava un ombre nombrado Haribi Yomtov. Esto muy sigura ke no ay morador viejo de Balat ke no lo konose. La alkunya? No es importante. Todos lo konosian por Haribi Yomtov…
El era bashiko i godriko, ma teniya un briyo en sus karas koloradas… todos lo keriyan byen ariento Balat.
Haribi Yomtov era mezamer del kal de Yambol i braso derecho del hazan Liya Zalma… el solo mezamer era? Noooo… el aziya kemeas, aprekantava, ambezava orasyones i deskorsos de bar-mitzva a los ijikos… i era el famozo kazamentero de Balat. Aziya las listas de las muchachas i muchachos djudyos, se iva a sus kazas i les dizia: “tengo un buen partido para tu ija u byen tengo una buena ijika para tu ijo”. Despues los azia entrevista en el kafiko del bodre de mar de Balat, si se plazian se metiya en medio i empesava los tratos de dota i ashugar. I kuando se disho Besimantov, haribi Yomtov tomava su parte.
Uno de sus buenos kazamyentos fue la ija del shef de la tulumba de Balat, kon el ijo de Bohor el tanyedor. La noche de la boda ken no avia ayi… Moiz i Jak Loya los ishbitiridjis, Yafets, el kasap ke kito a su ijo doktor. Dr. Kurtaran, Negri el farmasien, Marko el ornero, Sinto el kimurdji, Avram de la Baraka kon su mujer Ester i la ermana Sinyoru ke kedo en la kyoshe, Yusef el kiaya, Binyamin el shekerdji, era en todas las fyestas ke se komiya los alkonfites suyos… i Binyamin kito a su ijo doktor, siguro el Dr. Davit Kamhi. No es por dizir ke de Balat salyo munchos doktores.
Akeya noche de la boda si savesh lo ke afito… Entre tanta djente, un ladron, nasido de vyernes, entra komo envitado de la boda a la kaza del novyo… En estando todos ariva komyendo, riyendo, kantando i baylando, el empesa a rovar i inchir el sako ke se trusho kon el. En supito kaye un vazo enbasho i se rompe. El padre del novyo oye un patirdi abasho i echa un grito:
- Heeey! ken es? Ken ay abasho?
El ladron mareado i shasheyado kon espanto le responde:
- Ke no se espante sinyor, ke no se espante! Ladron djudyo es.
