Eliz Gatenyo
En el apartamento de Doğruyol, (Bankalar Caddesi) ande nasi i me engrandesi, moravamos 13 famiyas… No se kere dicho ke todos eramos judios, aparte de una famiya levantena. En este apartamento, de lo bueno muncho, aviya 5 Rafaeles. Uno era Rafael el shastre, un shastre alavado, el otro era Rafael el ijo regalado de Madam Oro la vizina, un otro era Rafael el pilisti, un ijiko muy muy yaramaz, un otro era mi padre, i el mas famozo era Rafael el Baragan. Este Mösyö Rafael el baragan era muy alto, godro, moreno, ancho i teniya ojeras pretas. De espantar… El era Gazi. Gerreyando en la gerra de Çanakkale, le entro una bala a la mano i se le korto el inyervo de dos dedos. Por esto tomava mezada de Gazi. I en lo ke uvo el Varlık vergisi no lo taksaron i ni ke entraron a su kaza para azer “varlık tespiti”. Ansina fue ke munchos metyeron a su kaza todas las kozas presyozas ke teniyan. Tanbien los ashugares de las ijas/ijos. Mi mama me kontava ke akeyos tiempos la kaza de este Rafael el baragan paresiya depo. Yeno asta la puerta. I eyos aviyan kedado a morar en una kamaretika, para azer plazer a los vizinos, amigos, paryentes, konosidos.
Yo vos va kontar uno de sus aventuras, ke todas eran muy enteresantes.
Todas las kazas de akel entorno teniyan tarasas grandes en los tejados. Aya todas las vizinas enkolgavan los lavados. Era en mizmo tiempo un lugar de rankontrarsen las vizinas i echar dos lashones entre los echos para deskansar. Agora vemos ke todas estas tarasas se izieron kafes i bares. La djente se van aya para tomar una bevyenda o para komer, en admirando la maraviyoza vista de la mar.
Las kazas eran lado kon lado apegadas. Un diya a la kaza de la kyoshe, entro ladron. En el apartamento se apersivyeron ke ay ladron, en kovaladeandolo, se fuyo al tejado. I los vizinos detras… El ladron vido ke se aferro komo en un kapan, ampeso a saltar de tarasa a tarasa i komo el apartamento muestro era el apartamento de alkavo de la sira, no pudo mas saltar i se eskondyo detras de una chimeneya. Pishin los ke moravan en el primer apartamento, mos dieron haber, ke el ladron esta en la tarasa muestra. Muy bien, ama ken se va suvir a la tarasa para aferrarlo? Mösyö Rafael disho: No vos espantesh, yo ya suvo. I en verdad suvyo a la tarasa i despues de un chiko pleto, lo aferro. I le dyo una haftona una haftona, por ande se abolta. Lo tomo de la oreja i lo arasto asta la puerta de la kaye. I aya tanbien le dyo una haftona buena. Entremyentes ya aviyan dado haber a la polisiya. Vinieron los Polises. En supito el ladron se echo a los brasos de los polises en arogandoles: Aman aman, vos rogo salvame de este ombre, ya esto razi de entrar en prezo!
