El Numero Tredje

Dora NİYEGO Judeo-Espanyol
15 Mayıs 2019 Çarşamba

En algunos paizes, el numero tredje es konsiderado komo un numero ke traye negro mazal. Ay una seria de teorias por ke el numero tredje traye negro mazal ma esto es konsiderado komo una superstision.

En la sena dalkavo de Jezu, aviya tredje personas alrededor de la meza. Una de estas tredje personas, Judas Iscariote, fue el traidor de Jezu, i esta persona era el tredjen asentado en la meza.

El viernes, 13 de oktobre del anyo 1307, el rey Felipe IV de Fransia ordono ke los Kabalyeros de los Templos seygan asasinados.

El anyo ke tiene 13 lunas yenas en lugar de 12 lunas yenas, bozdeyava la organizasion regular de los festivales de la eglizya.

En las kulturas antiguas, el numero 13 reprezantava la feminidad, porke 13 korespondava al numero de siklos lunares (menstruales) en un anyo (13 x 28 = 364 diyas).

Las Leyes de Hammurabi eskritas en una pyedra silendrika de dos metros, son 282 artikolos, ma el tredjen artikolo no esta eskrito.

Por kontra, segun la tradisyon judiya, el numero 13 es muy emportante i es konsiderado komo ke traye mazal bueno.

Kuando un ijiko judyo vino a la edad de 13 anyos, aze Bar Mitzvah i es ovligado a segir las reglas judiyas. Tambien va tener los mezmos derechos i responsabilidades de un adulto. Una ijika selebra su Bat Mitzvah kuando vino a la edad de dodje anyos.

Maimonides deklaro ke el numero 13 reprezenta el numero de prinsipios de la ley judiya.

El judaizmo es bazado en los 13 tribus de Israel.

Segun el Talmud, el tema prinsipal de las orasyones de Selihot son bazadas en los 13 mizerikordas prensipales ke Dio ensenyo a muestro padre. 

Alora para mozotros los judios, el numero 13 traye buen mazal.

 

Siz de yorumunuzu yapın

Tüm Yorumları Görün