En vezes, buenas reshas azen vizinos buenos dizen syertos: sovre los Ghettos

Metin DELEVİ Judeo-Espanyol
22 Mayıs 2019 Çarşamba

El termo “Ghetto” tyene una memorya triste en la istorya djudia i una asosiasyon muy negativa kuando se refera a syertos lugares urbanos proves. La etimolojiya del termo: orijinario de una rejyon aryentro de la sivdad italyana de Venezia, ande la povlasyon djudia fue forsada de morar. Los linguistas no arivaron a un konsensus etimolojiko sovre la palavra “Ghetto”. La teoria la mas popular dize ke provyene de la palavra venesyana para “fierreria” (dökümhane). Mos akodraremos ke ande se topava el ghetto orijinal en Venezia aviya una fabrika ke produsia armas para el governo. Otros afirman ke tyene komo orijin la palavra hebrea “get - obtener” komo la ley djudia de divorso o separasyon. Otros afirman ke provyene de la palavra yiddish “gehektes - sekreto”, ke sinyifika “serrado”. Otros derivados inkluyen la palavra en latino “giudaicetum”, la palavra italyana “borghetto”, que sinyifika sivdad chika, o la antigua palavra en fransez “guect”, ke sinyifika  protejar.

Malgrado ke algunos ghettos en la Evropa sirvyeron komo sentros de povlasyon djudios para forsar la separasyon kon los otros puevlos, otros fueron kreados por azardo komo sentros ande la majoridad eran djudios.

El primer “Ghetto” se establesyo en Venezia el 8 de Iyar de 1516, ke koresponde al 10 de avril. Esto fue segido por el dekreto papal del Papa Paul IV del 27 de febrero de 1562, ke se konose kon el nombre “Cum nimis absurdum”, ke adjunto restriksyones duras sovre la vida djudia en el tyempo de la Renaissance italyana. Komo rezultado del edikto papal, los djudios tuvyeron ke meter una insinyiya amariya komo medyo de identifikasyon relijyoza / etnika, i se metyo limites a la propiedad djudia de byenes, komersyo i banka. No abasto, los djudios fueron defendidos de vender artikulolos vitales para la vida, komo alimentos, etc. Komo rezultado, los djudios se alesharon de los echos de emprestiya de moneda i de bankas, i empesaron a lavorar komo eskidjis, vendyendo artikolos vyejas de segunda mano, o komo los proprietarios de magazenes de emanetchis.

Aparte de los Ghettos, los djudios se konsentraron en areas yamados komo “Yahudi mahallesi”. La mas grande parte de estas rejyones eran ekstansyones  de los Ghettos i se topavan en las partes mas demunidos de la sivdad. Ghettos i Yahudi mahallesis (o komo se yama en espanyol Djuderias) egzistiyan en la mayoria en las grandes sivdades de la Evropa (aviya dozenas), aparte de las areas separadas (syertos se nombravan komo Ghettos) en syertas partes de la Afrika (Ejipto, Marroco, Tunisia), en la Asia i el Medio Oriente (China, India, Líbano, Irak, Siria) i en las Americas (Argentina, Brasil, Venezuela, Mexico, Estados Unidos i Canada).

Antes de i durante la Segunda Gerra Mundial, el “Treser Reich” fraguo o aparejo Ghettos por otra razon i intensyon. En los Ghettos, los djudios fueron separados en los ke podian sirvir por lavoros duros i los ke no podiyan lavorar o sirvir fueron asasinados. En 1942, los Nazis empesaron a aplikar la Operasyon Reinhardt, lo ke obligo a los Djudios en los ghettos (no syempre establesido en la zona tradisyonal ande bivivan los Djudios) i funksyono komo areas de preparasyon para la evantual deportasyon a los kampos de eksterminasyon.

De ande me akodri eskrivir esto? La semana pasada era el 503en aniversaryo del Ghetto de Venezia…

 

 

Siz de yorumunuzu yapın

Tüm Yorumları Görün