Henri Çiprut
La semana pasada el museo sefaradi de Estambol aresivyo munchos musafires aunke era diya de alhad i aviya un tiempo maraviyozo. Por dos razones: en primero akel diya aviya el konsierto de Lozan Mübadilleri Korosu, ke fue una reushita de todo punto de vista, ama mizmo antes de la ora del konsierto el salon de abasho del museo estava yena de djente, porke aviya una aktividad organizado por los mansevos de muestra komunidad.
Esta aktividad ke sus organizadores yaman “Venid mos konoseremos” (en turko “Gelin Tanış Olalım” inspirado del famozo refran de Yunus Emre) tiene por buto de dar a la djente la oportunitad de demandar todo lo ke keren sovre los djudios, sus istorias, i el djudaizmo, sus leyes relijiozas, sus kostumbres ets. El todo se aze en un ambiente estrukturado; se aze entrevistas kurtas de 20 minutos.
Ansi diziya el poster de la aktividad: “Ken son los djudios? Vamos a responder una por una, a todas vuestras preguntas ke siempre deseatesh de demandar ama puedeser ke no tuvitesh la oportunidad de demandar, sovre los djudios de Turkia.”
Es siguro ke una entrevista de 20 minutos no seria bastante para kontar todo sovre el djudaismo i es por esto ke los organizadores no empesaron a kontar nada, ama la entrevista se desvelopo en la otra direksiyon, en respondyendo a las preguntas de los musafires.
En verdad Venid Mos Konoseremos, es una adaptasyon a la djudia de la aktividad famoza Yaşayan Kütüphane (Biblioteka Umana) organizado durante anyos i panyos por la fondasyon TOG (Toplum Gönüllüleri Vakfı – Fondasyon de Voluntarios de Sosyedad). Este aktividad de Biblioteka Umana tiene por buto de luchar kontra las prejudisias de las kualas sufren la djente konsiderada marjinales por el resto de la sosiedad, seya por su etnisidad, su relijyon, o orientasyon seksual, o profesyon, o su kondisyon medikal, ets. La aktividad organizada por la primera ves en el anyo 2005 en Danimarka es un aktividad de derechos umanos, i tiene komo model de ser organizada komo una biblioteka. Es por esto ke tiene su proprio jargon emprestada del kampo leksikal de la biblioteka: los partisipantes son konsiderados komo livros, los ke vienen a demandar preguntas son los meldadores. En empesando del anyo 2006, el TOG organizo munchas vezes esta aktividad de la kuala yo mismo kon Karel Valansi i Robert Alev somos los veteranos.
Komo en estas Bibliotekas Umanas, mosotros los “livros djudios” siempre fuimos unos de los mas demandados komo “best seller”, mos vino la idea de krear una adaptasyon de esta, organizarla solo kon los “livros” djudios ama por siguro en trokando su nombre i yamandola Venid Mos Konoseremos en lugar de Biblioteka Umana. Esto por dos razones: En primero komo ivamos a tener solo los djudios komo partisipantes i no los otros titolos de “livros”, lo ke keriamos azer no seria una Biblioteka Umana. I ademas, todo este jargon de biblioteka o de livros ets. es una koza muy difisil para dar a entender a la djente. Ansi topimos el remedyo de yamarla Venid mos Konoseremos. Keresh konoser a los djudios? Venid. Muy fasil i praktiko.
Este anyo Venid Mos Konoseremos ke fue organizada por la kuatrena vez en muestra komunitad aresivyo mas de 65 personas en una ora i medya. Tenemos el dover de rengrasyar a todos ke se aunaron i penaron por este buto: Karel Valansi, Robert Alev, Dani Baran, Avraham İşcen, Reysi Haleve, Jilda Abravay, i İzak Kolman. I tanbien a los ke se aunaron a mozotros al punto dalkavo para ayudarmos, Metin Delevi i Silvyo Ovadya.
Agora ke savesh lo ke sinyifika Gelin Tanış Olalım, si enkontrash en las redes sosyales haberes ke vamos a organizar otruna vez, (i en verdad lo vamos azer) no vos olvidesh de dar haber a vuestros amigos i konosidos ke podrian ser enteresados. Mosotros somos nombrosos i preparados para aresivirlos i responderles.
