Eliz Gatenyo
Kaje dos mezes antes eskrivimos “Purim purim lanu” ke ya aviya vinido Purim i ivamos a ampesar a azer aparejos para Pesah. Dishimos i “Pesah en la mano”. Un mez paso komo el ayre, ya vino Pesah, ya se avlo del Seder, de las komidas, de los pransos ets. La kontinuasyon de esta kantika es “Ya vino enverano, para ir al kampo”. Na ke ya vino i enverano, kon sanedad i alegriyas pasan los diyas sin ke mos apersivimos. Yo digo ke diya ke pasa presto es diya ermozo. No se entiende komo ampeso i komo se eskapo. Ma malorozamente los diyas ke no son agradavles, no se keren eskapar. Kada nada miras a la ora, lo ke paso es 10 puntos, ke te paresen ke son 10 oras.
El enverano es una sezon muy ermoza, las flores de kolores a kolores, los pasharos, el aver, traye alegriyas a los korasones. Frankamente, no puedo dizir ke me plaze muy muncho esta sezon. Primo por la kalor fuerte ke me deranja, sigundo por modo de estos moshkos ke me beven la sangre i ke me kitan la fasla.
En lo ke se aserka el enverano a mi me empesa a dar una emosyon … Vash a dizir deke? Porke ya me lo penso ke los moshkos van a empesar a tener pranso riko. Si estamos asentados 5 personas en mizmo lugar, los moshkos preferan de moryerme i no se aserkan de dingunos. Ya me meto spray, ya meto limones al entorno, todo lo ke oygo … ma no ay hayre. Ya me ambezi a no araskarme, aspero unos kuantos minutos, i la araskina se amaha. Ma ay dos anyos ke se reprodusio un tipo de moshko ke lo yaman “moshko de tigre” ke esta moryendo kon tosigo. Disheron ke estos moshkos mos vinieron de el Proksimo Oriente. Los moshkos ke konosemos moryen las noches ma estos estan 24 oras en ovra. Ande estan moryendo se aze un baloniko de agua i tres diyas da araskina kon dolor. Kuantas vezes me fui al doktor del ospital, aviya muncha djente komo mi, las kuras ke estan dando malorozamente agua de pozo. Mos disheron ke estan lavorando a entender ke tipo de tosigo tienen estos moshkos muevos. Inshallah este enverano ke no tengamos este dert. Ya esto razi a los moshkos del tiempo de muestros padres.
Verso la fin del mes de Mayo ya ampesamos a alevantar los tapetes, trokar los perdes de invyerno para ke no se kemen del sol. Alimpyamos la kaza de la kampanya i djusto ke ya fiksamos un diya para movermos a la Ada, empesan luvyas i turguelos. Unos kuantos anyos mos enganyimos al sol i a la kalor, mos fuimos a la Ada i aya mos entezimos por ke empesaron las luvias.
La semana proksima tenemos la fiesta relijyoza muzulmana “Sheker Bayramı” i por esto una semana de vakasyones en la Turkiya. Kada uno lo fiesta seya en su kaza, seya en un viaje o seya en las kampanyas. Tendremos siempre fiestas i alegriyas en los korasones.
