La Alheira es una “delicatesse” ermoza i savroza. Un tipo de salsicha portugeza ke se konose por su kontenido: el ajo i las migas de pan, mesklado aryento de la karne. Sin olvidar Alheira vyene de la palavra “alho” ke es muestro ajo. Este “charcuterie” es tan estimado i amado en Portugal ke el fue votado komo una de las syete maraviyas gastronomikas de la nasyon en una anketa ke se izo en 2011. Agora vos va vinir al tino una demanda: ke dariyaver kon los djudios? La razon es ke La Alheira fue inventado por los djudios i lo mas importante, para salvar sus vidas!
Al medyo del siglo XVI en los anyos de 1540 egzaktamente, en los tyempos kuando la Enkizisyon espanyola estava en el piko, los djudios de Portugal izyeron todo el posivle para guadrar i no amostrar sus djudaismo, era el tyempo de los djudios sekretos o marranos. Ma en una sivdad de montanya en el norte de Portugal ke se yamava Mirandela, este akto no fue fasil. Kada anyo, los portugezes enkolgavan las salsichas de puerko en las puntas del tejado para sekarlas. Estas salsichas eran konservadas por los abitantes del kazal komo un alimento durante el invyerno. Ma para los djudios aviya un impedimyento. La komunidad djudia marrana, sekreta de Mirandela, malgrado ke se aviyan konvertido al katolisizmo, no komiyan karne de puerko. Sin puerko, i por lo tanto sin salsichas enkolgados en el tejado, i ansi eyos ivan a ser un eskopo fasil para los antisemitas ke bushkavan afilu un menudo detalyo para topar i entregar a la inkizisyon sus vizinos djudios.
Entonses los djudios izyeron lo ke syempre azen: topar ideas majestuozos. Los djudios de Mirandela enventaron una mueva salshicha, la Alheira de Mirandela, ke izyeron kon karne de poyo i pan, todo los dos syen por syen kasher i sin pyedrer tyempo los enkolgaron a sus tejados. La sakana i el sospecho fue ansi divertido.
En estos dias, la Alheira ya no esta mas asosyado kon los djudios ke lo inventaron. Se puede topar Alheira kon materyal taref por seguro i en syertos lugares echo kon karne de poyo a la manera tradisyonal djudia ma no kasher.
Un estudio realizado en 2008 topo ke el 19,8% de los portugezes tyenen una asendensya djudia. I en 2013, Portugal se izo el treser pais despues de Israel i Espanya a dar un derecho de retorno a los djudios.
Ken save, puedeser vamos a ver la versyon kasher de esta eroika salsicha djudia en muestras mezas.
