De Lag Baomer A Shavuot

De Lag Baomer A Shavuot

Shavuot... Una de las tres grandes fyestas, kon Pesah i Sukkot. Eskapando la “Sefirat Omer” de 49 diyas, en 6-7 Sivan, oganyo 9-10 de Junio, estamos selebrando esta fyesta ke se yama tambien “Hag Habikurim”. Es el diya ke Moshe Rabenu resivyo la Tora, en el Monte Sinay. “En este Diya abasho el D. al Monte de Sinay a dar la Ley a su puevlo Israel... Asigun la leyenda, David Ha Meleh muryo en Shavuot. Es una de las razones de meldar la Megila de Ruth en Shavuot, syendo ke David era el desendyente de Ruth la Moavita...”. 

Este teksto lo esto eskrivyendo oy, el 12 de Mayo “Diya de la Madre”.  Mis penseryos se fueron de muevo a mi kerida Madre (de b.m.) komo syempre en este diya espesyal. Otomatikamente me yevaron otruna vez a mis chikos anyos, kon un sentimiento de eskarinyo i de nostaljiya. Puedo dizir ke este teksto se va azer de si para si, asigun me van a dirijar mis rekuerdos, mis sentimientos de nostaljiya i mi pendola...

En akodrandome de akeyos anyos, muy frekuente nombro dos lugares. Galata, ande bivimos un syerto tyempo djuntos kon mis avuelos paternal. El sigundo lugar es Tekirdağ, ande pasava mis enveranos.  Ayi bivi diversas etapas de mi chikes, kon mis avuelos maternal. Sus filozofiyas, sus maneras de aserkarsen a muestras tradisyones, a la relijyon, me influensaron tanto, ke oy en diya, despues de tantos anyos, las tengo kon toda sus freskor en mi memorya. Tambien mi kerida Madre (de b.m.), bastante tradisionalista, perkuro a konservar estas tradisyones i transmeterme, a lo menos una partida.

Espesyalmente los anyos 41-44 fue la perioda, komo ke diga, la mas ajitada i estranya de mi chikes. Komo lo tengo ekspresado munchas vezes, mi padre estava azyendo su servisyo militaryo (20 Klasas). Tambien, en mis rekuerdos avli de las estrechuras, de la mankura de syertas kozas, espesyalmente de asukar. De sorte ke, afitava ke mi Nona o mi Madre no pudiyan azer las dulsuryas asigun lo dezeyavan. Seya la bimbriyada de Purim, la almendrada (masapan) de Pesah o el dulse de mansana de Rosh Ashana...

Ma, el enverano del 42, mi Madre mos estava rezervando una sorpreza. Asigun eya, era inadmisivle de pasar la fyesta de Shavuot sin azer el tradisyonal “sutlach de arroz”... Kon este eskopo invyerno entero estuvo ekonomizando a las eskondidas pokas, pokas kantidades de asukar. Dunke, Shavuot ya estava en la puerta, i demas, la Primavera de akel anyo sintimos rumores dizyendo ke los soldados rezervistos ivan a ser liberados en serka. Estavamos asperando kon despasensya, i a kada soneriya de la puerta,  estavamos koryendo a avrir...

Mi Madre kon la asukar sorpreza, se estava aparejando a azer este sutlach, ke le plaziya tanto a mi Padre. Azer dulsuryas de leche es una tradisyon de Shavuot, i nunka mankimos a esto. Komo se save, el otro nombre de Shavuot es “Fyesta de leche i miel”. Finalmente mi Madre izo el sutlach. Demanyana de mued, mi Nono se fue al “Kal de los Edirnelis”(*). Era muy serka de muestra kaza. Lo asperimos i en el dezayuno mo lo komimos el sutlach, ma un poko desganados, deziluzyonados. El Papa miyo no aviya vinido...

Anyos pasaron... Despues de la Aliya de mis djenitores mos fuimos munchas vezes a Israel en Shavuot. Mi padre i mi marido viniyan de la Sinagoga, i komiyamos las borekitas de berendjena i el sutlach delisyozo ke aziya mi madre, i ke nunka reushi a azerlo komo eya... Oy, en este diya espesyal, otruna vez la esto nombrando en sintyendo su absensya. Ke su alma repoze en paz, Amen... Hag Shavuot Sameah.

(*) Este edifisyo aktualmente es el “Schneidertempel Sentro de ARTE”.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın