Un Rekuerdo De Shavuot

Un Rekuerdo De Shavuot

Eliz Gatenyo

No ay fiesta de Shavuot ke no me akodro este rekuerdo ermozo de mi chikes.

En Shavuot, desparte ke tenemos una alegriya porke resivimos la Tora, tenemos uzansas ke pasan de madre a ija durante siglos. En esta fiesta azemos dulse de roza, sütlach i biskochos. La demanyana de Shavuot, salen del kal i en el dezayuno se kome  esto todo.

Esto dicho, komo dize muestro amigo Edmond Cohen, vineremos a mi rekuerdo de la chikes.

Kuando teniya yo komo 10-12 anyos, en Shavuot estavamos en Yeshilköy en la kampanya, ande mos ivamos kada enverano. Un diya antes, mi mama aparejo una kaldera yena de dulse de roza. De una golor maraviyoza… Metyo el dulse en katramizes i para ke no vayamos a paponeyar, los guadro aryentro de un orno ke no lavorava mas i ke lo aviyamos metido al balkon. No metyo los kapakes de los katramizes, seya para ke se yele el dulse seya para ke no se asukareye o ke no se moje del bafo. Aparto una kase para akel diya ke ivan a vinir a bever un kafe mis tiyas ke moravan djusto en frente. Vinyeron mis tiyas, la mama les ofresio el dulse en una tavlá, kon kucharas i kupas de agua. Kada una tomo una kuchara i… djusto akel momento vino la patrona de kaza ermeniya a demandar no me akodro kualo. La mama la kombido aryentro i le ofriyo i a eya el dulse. Eya no saviendo la uzansa, tomo la kase i se la komyo asta la fin. Mos kedimos mirando. Para mozos no aviya kedado nada siguro. Mi ermana i yo demandimos a la mama ke mos de i a mozotros, eya disho ke no ay mas, ke lo ke ay es para la fiesta porke no keriya amostrarmos el lugar ande los eskondyo los dulses.

A la demanyana, ke ya era Shavuot kijo kitar la mama los dulses en aparejando la meza. Salyo al balkon i oyo unas bozes komo pasharos. Cik Cik Cik… Esta boz viniya del orno viejo. Eya ke avre el orno, ke ve? En kada katramis aviya un ratoniko. En los unos estavan enkashados de kavesa para abasho, en los otros estavan aferrados por la kola i en uno estava un raton entrado asta el garon. No se estavan puedyendo eskabuyir para salir de akel dulse ke estava bien atado komo madjun. Desparte del ke se entro por kavesa para abasho, todos estavan gritando cik cik komo un koro.

Echimos siguro los dulses kon los ratones i los katramizes endjuntos al kampo de atras.

En kurto akel anyo en Shavuot mos kedimos sin dulse de roza. La mama estava muy triste siguro ma mi ermana i yo mos estavamos riyendo i aziendole pizmas, “Oh oh olsun, tu no mos dates una kuchara de dulse? Na! Los ratones se lo gozaron”.

Kon esto vos auguro Shavuot alegre i una enveranada buena.

 

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın