Eliz Gatenyo
Oy vos kontare una leyenda ke me kontaron kuando yo era dainda chika.
Un diya komo oy, ke aviya muncha kalor, kijo dar Eliyahu Anavi un torniko en la sivdad. Esto ke oyo uno de sus elevos, le rogo ke lo tome a el a su lado. Eliyahu Anavi en primero no aksepto, ma despues ke el elevo ensistyo muncho, disho: Bien, ven kon mi ma kon una kondisyon. Todo lo ke vas a ver i oyir no me vas a demandar: “De ke?”. Le prometyo el elevo i se metyeron al kamino.
Kaminando debasho del sol kemando, vinieron a un kazal. Djusto en medyo del kazal, aviya una fuente. Las mansevikas del kazal estavan arekojidas aya hem para avlar i hem para inchir agua freska para yevar a kaza. Akel tiempo no aviya enstalasyones de agua en las kazas.
Eliyahu Anavi se asento debasho de la solombra de un arvole. Enshugando la sudor de su frente, vido una mansevika ke ya incho los djarros i los estava yevando a su kaza. La yamo: Te rogo ke me des una kupa de agua freska por ke vine de un kamino largo.
“Kualo?” le disho la mansevika? “Tanta ora asperi yo debasho de este solero para inchir estos djarros, para ti las inchi? Ke echo tienes? Vate i beve tu!”
“Munchas grasias, te arogo ke tengas un mazal kon un manseviko bueno!”. El elevo ya se kedo enkantado ma siguro komo teniya la promesa, no le demando nada.
10 puntos despues paso otra mansevika. I eya aviya inchido sus djarros. En pasando delantre de Eliyahu Anavi, la yamo. “Ijika te rogo ke me des un poko de agua, por ke vine de muy leshos. Esto kansado i tengo muncha ser.” La mansevika pishin se aserko. Le disho: “Siguro padre, toma agua beve asta ke te arefreskas. Toma mas agua lavate la kara, moja tu kavesa, arefreska tus piezes. Yo so manseva, ya me vo demuevo a la fuente, yene incho los djarros”. Eliyahu Anavi despues ke ya se arefresko i bevyo agua le disho a la ijika: “Munchas grasias kerida ijika, El Dio ke te de un mazal de un marido negro!” La ijika no disho nada i se fue. Ma el elevo mas no pudo detenerse. Disho: “Perdoname ma malgrado ke te aprometi, no me va pueder detener de no demandarte lo ke izites. A una ijika ke no te miro ni en la kara la bendizites i a la ijika ke te izo buendad la maldizites. Deke?” No entendi te rogo ke me eksplikes para ke me ambeze i yo.
Alora Eliyahu Anavi le ekspliko. A la ijika ke teniya el korason duro, le arogi un mazal kon korason bueno, i a la ijika ke teniya un korason bueno, le arogi un mazal kon korason malo. Esto es por ke un malo de estar al lado de un bueno, se aze i el bueno. Un bueno nunka se aze malo, ma un malo siempre se aze bueno. Ansina vamos a ganar otras dos personas buenas.
