Forti Barokas
Yo tengo dos vidas, una de invyerno i otra de enverano. Agora vash a dizir kualo es dos vidas? La repuesta es ke enverano bivo muy diferente de invyerno.
Invyerno bivo kon planos i programes. Por egzempyo, lunes i myerkoles tengo kursos, martes es diya de fikso kon las amigas de anyos. El grupo se yama “Salının Gülleri” (Las Rozas de Martes). Ya estamos un poko rozas afanadas ma el nombre mos da moral. Djueves es diya de pazariko, empleyar i diya del koro NES. Entremyentes me vo a Moda i a İstinye a ver a los inyetos, a las ovras i fin de semana u teatros u filmos u konseres, lo ke mos dyo el Dyo.
Esto kontinua fin ke se eskapan los kursos i se serran las eskolas; los ijos se van a vakansas i yo kedo solika, de muerte no. Tomo la validja i me vo a la Büyükada, ke adoro.
Aki empesa la vida de enverano. Komo me alevanto muy presto, no syempre, de ves en kuando, me vo a kaminar en el bodre de mar i despues me vo a la plaj.
Sali no sali a kamino, empeso a saludar, empeso a sudar…. Porke kale ke des kuentos.
- Forti, a la plaj te estas indo?
Apenas di dos pasos,
- Ande bueno, a Estanbol vas abashar?
- Deke no vyenes a bever un kaviko?
- Deshala, eya no tyene tyempo
(Ya le dyo la repuesta por mi)
Si entri al charshi:
- Oy no ay mar?
- Kualo vas a empleyar?
- Ke se va gizar oy?
- Toma sardela, esta muy freska; aze i una choban salata
- Del primer no tomes, esta muy karero
Un poko mas aya:
- A la mar?
- De ande entras?
- Esta limpya?
- Inezika ya vino?
- A Suzan la vites? Le nasyo tresera inyeta
- Los ijos? Kuantos inyetos tyenes?
Bendicho el Dyo, la primera eleksyon ya la pasi. Apenas entri a la plaj… si me fui demprano:
- Tu no vyenes estas oras, ke te afito?
- Deke vinites presto, a Estanbol vas abashar?
- Atyo mirala, halhal se metyo!
- Bravo a esta edad te metites halhal!
(Ke es la edad de meter halhal no se!)
- Forti se engodro no?
- Yok djanim, se aflako
- Ayde deshalas ke digan, estas muy buena mashallah
(Neysa ya dyeron karar!)
Si suvi a la guerta a djugar aya es otro teatro.
(Los nombres son imajinaryos)
Sara no djuga kon Mari
Mari no djuga kon Ester
Ester no djuga kon Lili
Lili no djuga kon Suzi
Suzi no djuga kon Beki
A la tadre ijikas, a demain, a las 2 en la guerta.
Keridos lektores no kije ni djuzgar ni blamar a dingunos, es ke me plaze azer shakaikas.
El Dyo ke no mo la trayga a dezear esta vida. Ke no manken porke esto es sin apareser una terapiya muy grande…
Kon demandas i repuestas para kada anyo ke mos ayege el dyo kon todos djustos.
